НОВИ САД – Вчера, 23. марца, отримана рочна Скупштина Руского културного центру (РКЦ) у Новим Садзе, на хторей прилапени звити о роботи дружтва у прешлим року, як и плани роботи за тот рок.
Члени РКЦ у прешлим року орґанизовали, лєбо участвовали на 37 манифестацийох у своїх просторийох, лєбо як госци у других наших местох. Штреднє кажди машац члени осем скецийох, кельо тераз робя у РКЦ, мали вецей як три наступи. Участвовали на шицких наших фестивалох, успишно орґанизовали дзецински фестивал „Веселинка”, а прешлого року шветочно означени вельки ювилей РКЦ – 70 роки постояня.
Попри у обласци култури, члени РКЦ участвовали и на змаганьох у рамикох Спортских бавискох „Яша Баков”, у просторийох РКЦ отримовани годзини руского язика з елементами националней култури, отримани даскельо креативни роботнї, числени друженя дзецох и одроснутих.
У 2016. року РКЦ розполагал з 2,7 милиони динари, потрошени коло 490 000 динари вецей, алє як надпомла директорка РКЦ Наташа Макаї Мудрох, то нашлїдзене длуство, хторе би до конца рока мало буц вимирене.
План роботи за тот рок завиши од прилїву средствох хтори ше достава по проєктох на основи конкурсох. За тераз уж отримани дзевец манифестациї, а рахує ше же до конца того рока РКЦ отрима исте число програмох як и влонї.
