НОВИ САД – Всоботу, 2. юния, у пополадньових годзинох, у Железнїцким парку у Новим Садзе, отримани Фестивал „Блоксток”.
На тогорочним „Блокстоку”, у парку на бини при Желєзнїцкей и автобускей станїци, попри познатих и преславених панк рок ґрупох наступели и млади, алє и новосновани бенди – „5 минута славе”, „Црни паун и Ненад Паґонис”, „Руке у вис”, „RocHoir kids”, „UV ”, „Амайлия”, „Mortal Kombat Bend” и „Ритам нереда”.
Млади и ище нєафирмовани бенди маю шансу представиц ше на тим Фестивалу, та того року „Блоксток” отворела новосадска ґрупа „5 минута славе”, хтора уж ма вецей успишни наступи. Нєсподзиванє бул „RocHoir kids”, перши сербски дзецински рок хор з Беоґраду, а публику прицагли познати бенди – новосадска „Амайлия”, метал-панк бенд „Mortal Kombat” з Беоґраду и панк рок ґрупа „Ритам нереда” основана ище 1987. року у Новим Садзе.
„Блоксток” означел и двацец роки од снованя. Перши Блок фестивал отримани 1998. року у Желєзнїцким парку зоз скромну опрему, а наступели лєм даскельо локални бенди пред малочислену публику. Познєйше концерти були озбильнєйши, алє нє орґанизовани су од 2010. по 2015. рок, кед ше видзело же таки Фестивал наисце за шицки ґенерациї популарни и ма вше векшу потримовку гражданох.
У сотруднїцтве зоз Мото-унию Войводини орґанизовани дефиле байкерох и вистава моторкох.
Уходнїци ше нє наплацовало, а на шанкох були шкатули за добродзечни прилоги.