Нєсовисни гражданє свой проблем зоз домашнїма животинями ришую просто – вируца их на улїцу. Алє, зоз тим наставаю проблеми цалого дружтва, а животинї правя проблем гражданом. У остатнїх даскельо рокох на улїцох у Дюрдьове єст тельо пси, як нїґда потераз, часто у чупору и по пейц шейсц.
Преширенє капацитету жабельского азила нє ришенє, а додатни проблем же од општинох з котрима ше гранїчи Општина Жабель, вона єдина ма азил. Нє ма го Титель, Бечей, Темерин, а Нови Сад ма за пиятину менєй капацитети яки им потребни.
Уж даскельо роки гражданє муша буц осторожни док иду по улїци, шпацираю ше, або гоня бициґлу. Родичи школярох и управа дюрдьовскей основней школи окреме застарани, бо ше пси найчастейше збераю у центре валалу и коло школи. Прето директоре школох, як и милиция, найчастейше волаю компетентних з општини же би ришовали тот проблем.
А КАДЗИ З НЇМА
Медзитим, до азилу мож змесциц коло 150 пси. Азил у Општини Жабель иснує коло седем роки, а зоз жабельским ЯКП „Чистота“ дїлує од януара 2013. року. Пожива, допатранє, ветеринаре, фахова помоц, отримованє гиґиєни простору у азилу, або коло нього, видвоюю ше з општинского буджета.
Радомир Злоколица
– Часто нас волаю и обвисцую же ше зявели пси на улїци, та зме длужни сколонїц их, а капацитети азилу нєпреривно пополнєти, та часто нє знаме кадзи з нїма. Такой, кед єст шлєбодни места нашо екипи виходза на терен и позбераю нови пси. Маме вецей возрости и файти псох, та, єст бокси за изолацию. Шицки вони потенциялно аґресивни єдни на других, а ми ше о тим мушиме старац и оддвойовац их. Корень пре вельке число псох на улїцох то нєсовисне справованє власнїкох псох, бо покля их лєм вируцую на улїцу, дотля буду проблем шицких нас – гварел Радомир Злоколица директор ЯКП „Чистота”.
ПРЕШИРЕНЄ АЗИЛА НЄ РИШЕНЄ
Вон твердзи же нїґда нє може буц досц места за псох у азилу, бо преширенє нє ришенє и гоч кельо их лапаю на улїцох, вше буду на вдереню явносци, бо на улїци вше будзе нови пси. Проблем ше риши док ше освидомя нєсовисни гражданє. Псох блукачох на улїцох найвецей єст по законченю сезони бостана, бо ше пси котри чуваю бостан найчастейше нє одводзи дому, а велї под час сезони сцекню з поля.
– Кед би ше пси нє пущало на улїцу, верим же би о мешац нє нє було анї єдного. У азилу их мушиме допатрац, и трошиц средства зоз буджета општини котри би ше могло индзей унапрямиц. Прето о тим треба нєпреривно бешедовац и освидомйовац гражданох – гвари Радомир Злоколица директор ЯКП „Чистота”.
НЇҐДА ИХ НЄ БУЛО ВЕЦЕЙ НА УЛЇЦИ
З приповедкох у валалє мож чуц же на вецей заводи пси блукаче укушели гражданох, та и наймладших з валалу. О власним искустве пошведочел Александар Живанов, учитель у дюрдьовскей основней школи, котри гвари же у остатнїх даскельо рокох обачиц же звекшане число псох на улїцох. Пред роком за нїм почали бегац три пси, а єден го и укушел.
Александар Живанов
– На роботу ходзим на бициґли, и вецей раз ше ми удало сцекнуц од нїх. Но, раз ме єден хвацел за ногу и укушел. Такой сом пошол до амбуланти, нога ми була кирвава, було видно укушенє и остали рани од пейцох зубох. Штири днї сом ходзел на превиванє. Тоти пси би нє були на улїци кед би их власнїки нє пущели з обисца. Пси блукаче каждодньово провадза дзеци по школу и ту оставаю, а раз сом их вигнал зоз школского двора. Було би барз опасне кед би нападли школярох – гварел учитель Александар Живанов, и додава же кед почал робиц, пред давецец дзевец роками на улїцох псох блукачох вообще нє було. Таки проблеми исную на уровню цалей держави, та часто мож чуц вистки о укушеню псох блукачох, а нє раз и у власним дворе, бо вони войду вшадзи научени же би ше борели за свой живот. Учитель Александар гвари же чул податок, же ше у каждим мешацу у року случа, просеково медзи двацец и двацеце пейц укушеня гражданох у општинских местох.
ЧИПОВАНЄ
У нашей держави чипованє псох нє зажило, та гоч у азилу иснує читач чипох, нє зна ше хто власнїк пса. О чипованих псох власнїки водза рахунку, бо знаю же кед сцекню з обисца буду врацени на праву адресу.
– Сцем апеловац на гражданох же би були совиснєйши и же би нє обвиньовали других пре псох блукачох. Нїґда нє треба вжац пса до обисца лєм прето же є красни док є мали, алє анї теди кед нє маце условия тримац го, и намиру затримац го. Вец, би требало вжац расного, бо иншак нє знаме яки будзе док вирошнє. Кед маме проблем зоз псом, вец го треба го ришиц, а нє пущиц го на улїцу дзе може укушиц дзецко, а за тото вец будзе одвитовац општина – гварел Радомир Злоколица директор ЯКП „Чистота”.
УДОМЦЕ ПСА НАЙДЗЕНОГО НА ШОРЕ
Азил жабельскей општини роби 24 годзини, алє за гражданох котри жадаю удомиц пса найлєпше же би пошли од 7 по 14 годзин гоч котри дзень. Роботнїки знаю характеристики каждого, єст вецей файти и возрости.
Вон ше находзи на драги Нови Сад–Зренянин, ґу Зренянину з лївого боку километер пред Ґолф центром.
Шицки пси у азилу чиповани, шприцовани и здрави. Жабельски азил добре сотрудзує з Дружтвами за защиту животиньох, окреме з гевтим у котрим Моника Брукнер, єден час удомйовала пси у своїм азилу у Дюрдьове.
Вона часто нащивює и совитує на котри способ ше треба старац о псох, а дзекуюци тому, после виглєдованя Дружтва за защиту животиньох зоз Шведскей, жабельски азил оценєни як треци по шоре у Сербиї по ушореносци и функционованю.
