Предсидателька Влади Сербиї Ана Брнабич тих дньох сообщела же будзе застановена робота на виробку новей Медийней Стратеґиї Сербиї, понеже Роботна ґрупа задлужена за тот процес вецей нє ма полни леґитимитет. Як потолковала, у Роботней ґрупи хтора роби у рамикох ресорного Министерства култури и явного информованя, тераз нє участвую шицки релевантни медийни здруженя, хтори поступнє виступали з того процесу. Премиєрка гварела же робота коло Медийней стратеґиї будзе застановена док ше нє обезпеча условия за творчи диялоґ шицких релевантних актерох, и надпомла же така одлука принєшена у догварки з предсидательом Републики Сербиї Александром Вучичом. Його совитнїца за медиї Сузана Василєвич пред тим прецизовала же би до новей Роботней ґрупи попри представительох держави, фаху и цивилноґо сектору, требало уключиц и медзинародни орґанизациї и фаховцох за медиї. По єй словох, держава так укаже же нє жада векше присуство и контролу у медийох, цо и була главна заувага коло новей Стратеґиї, и причина же релевантни медийни здруженя виступели з Роботней ґрупи.
Парадоксалне же тота обласц заправо детально реґулована у важацей Медийней стратеґиї хтора ше ма применьовац по 2020. рок, а хтора базована на началу софинансованя явного интересу у обласци информованя през конкурси. Гоч то нє идеални модел за шицких, у сущносци є солидни. Указало ше, голєм на паперу. У пракси зауважени скоро систематични потупйованя процесох конкурсного финансованя и фаворизованє дзепоєдних „подобних” медийох, а иґнорованє других.
Нова Стратеґия мушела би, насампредз, виправиц тоти злохаснованя и „дрибланя” сущносци медийней реформи хтори замерковала и Европа. То, у ствари, главни проблем на нашей медийней сцени, а нє тото же держава, важаца Стратеґия, а озда и тота будуца, припознава и „буджетски” винїмки як цо явни медийни сервиси лєбо специялизовани медиї – меншински, цивилни, студентски… ту дзешка и статус националних институцийох як „Политика” лєбо „Танюґ”. Скоро кажда система, та и медийна, функционує лєм кед ма винїмки. Нє треба баш шицко препущиц законом тарґовища.