ЗЕМУН – Пияток, 2. марца, у францисканскей церкви св. Йоана Хрестителя у Земунє, отримани пияти по шоре Шветови молитвови дзень под мотом „Кажде створенє Боже добро”.
На тим стретнуцу, у преполней церкви, и попри велькей жими и шнїговей нєпогоди, зишли ше вирни зоз протестантских Церквох, як и представнїки Православней Церкви зоз Любовиї и Малого Зворнику, зоз благословом владики шабацкого Лаврентия, домашнї римокатолїки и грекокатолїки.
Нашу Церкву представяли даскелї вирни на чолє зоз Олґицу Радович Лендєр, котра и читала порихтани молитви по руски.
Шветови молитвови дзень розширени по цалим швеце, а того року го обдумали жени зоз Суринамия у Южней Америки. Ґрупа женох потвердзела свойо шведоченє о вельким заєднїцтве, щесцу и почитованю других, цо и услов за очуванє нашей планети.
Прилог котри назберани подаровани Едукативному центру за особи з окремнима потребами у Беоґрадзе.
Пре спомнуту шнїгову нєпогоду, окрем домашнього паноца, фра Желька Паурича, того року нє присуствовал анї єден священїк зоз спомнутих вирских заєднїцох, як скорейших рокох.