Пондзелок почал Ноцни турнир у малим фодбалу

автор мар
872 Опатрене

РУСКИ КЕРЕСТУР – Пондзелок почал традицийни Ноцни турнир у малим фодбалу хтори на терену у Старей школи орґанизує домашнє Спортске дружтво „Русин”.

У катеґориї младших пионирох приявени три екипи – два з Керестура и єдна з Коцура, а у катеґориї старших пионирох пейц екипи – три з Керестура и по єдна з Коцура и Вербасу.

Найвецей, аж дванац екипи, приявени у конкуренциї сениорох, дзе штири з Керестура, по три з Вербасу и Кули, а по єдна Лалитю и Червинки. У катеґориї ветеранох ше змагаю седем екипи – три з Керестура, два з Кули и по єдна з Коцура и Вербасу.

Младши пионире, старши пионире и ветеранє бавя по принципу кажде з каждим, а сениоре перше подзелєни до двох ґрупох (на випадованє), а потим буду бавиц кажде з каждим.

Єден вечар ше бави штири змаганя – по єдну з ґрупох пионирох и ветеранох и два змаганя сениорских екипох.

Уходнїца за змаганя на Ноцним турнире кошта 50, односно 30 динари за младших патрачох. Кажда предата уходнїца участвує и у томболи, хтору обезбечую спонзоре.

ПОВЯЗАНИ ТЕКСТИ