РУСКИ КЕРЕСТУР – Прешлого викенду отримани два едукативни годзини у рамикох Школи рибарства и очуваня околїска котру орґанизує рускокерестурске Здруженє спортских рибарох „Коляк”.
На годзини рибарства ше одволали 25-еро пионире, члени Здруженя, за котрих членска карта безплатна, а вєдно зоз членску карту доставаю и рибарску карту. На першей годзини всоботу мали рибаре учели вязац квачки и о основним рибарским прибору.
На другей, нєдзельовей годзини, Коляково пионире достали нагоду ше опробовац у заруцованю циґоня на беґелю и упознац ше зоз файтами рибох, як и правилами риболову.
Треца, источашнє и остатня годзина, у тим циклусу школи будзе отримана идуцого викенду, а першенствено будзе пошвецена еколоґиї и очуваню околїска.
Едукаторе у Школи рибарства Михайло Костелник и Мирко Лазор, годзини ше отримую на Базену у лєтнїковцу Здруженя и отворени су за шицких заинтересованих. По законченю Школи, заплановане орґанизовац єдно змаганє на котрим ше школяре опробую у звладаних схопносцох.
