НОВИ САД – Серия подїйох хтори ше того викенду отримую у Заводу за културу войводянских Руснацох з нагоди 10-рочнїци тей рускей институциї, почалa вчера з Округлим столом „Репертоарни зборнїк за руски хори” и проєкцию видео прилога „Проєкти Заводу” чий автор редактор у Рускей редакциї РТВ Славко Винаї.
На округлим столє нашо фаховци з обласци музики, насампредз хорского шпиваня, розпочали догварку о пририхтованю архивней бази партитурох розписаних за хорске виводзенє хтори би були доступни шицким нашим културним дружтвом хтори маю хорску секцию.
През дискусию у хторей участвовали директорка Заводу Анамария Ранкович, дириґентка керестурского Хору Лидия Пашо, музични педаґоґ Ирина Олеяр, музична редакторка Радия РТВ Агнета Тимко Мудри и публициста Дюра Латяк як модератор, начално догварени катеґориї и обсяг нотних записох хтори би ше перше ушорели у диґиталним формату и дистрибуовали онлайн, а потим, кед будзе можлївосци, були публиковани и як друковани зборнїк.
Одлучене же би ше каталоґизовали шицки композициї хтори од документованого початку хорского шпиваня при Руснацох у медзивойновим периодзе по нєшка, виводзели нашо хори. Як катеґориї одредзени композициї за одроснутих, т.є. хлопски, женски и мишани хори, за дзецински хори и духовни композициї – литурґийни и коляди.
У другей часци вечаршей програми, емитована полгодзинова емисия „Проєкти Заводу” автора Славка Виная хтору Руска редакция РТВ зняла з нагоди 10-рочнїци Заводу. Гоч фокус емисиї на найвекших чечуцих проєктох чий Завод ношитель, през вияви вецей фаховцох хтори зоз Заводом сотрудзую од снованя по нєшка, тиж спатрена и акцентована улоґа тей институциї у чуваню, розвою и осучашньованю рускей култури, цо и водзаца мисия Заводу за културу войводянских Руснацох.
