Нє лєм же представела крачунски и вельконоцни єдла, руску шпиванку и облєчиво, Бобальова представела и Руснацох, людзох у Бикичу, и сам валал, та аж и Срим. Участвовац у емисиї – вельке дожице и искуство, алє друженє и путованя, як гварела, оставаю занавше запаметани.
Цалком случайно Невенка Бобаль з Бикичу була учашнїца першей сезони серияла Явного медийного сервису Сербиї „Кухня мойого краю”, хтори приказовала РТС, а слово о седем женох з валалских подручох хтори ше змагали у вареню єдлох, презентованю обичайох и традициї свойого народу и краю у хторим жию. Невенку за тот сериял препоручел Мирослав Кевежди и дал єй контакт телефон людзом з продукциї. То було досц же би приповедка почала…
ПЕРША НАЩИВА И КАСТИНҐ
– Було то у юнию прешлого року кед ме з РТС волали и опитали ше ми же чи сом зацикавена участвовац у програми. Позитивно сом одвитовала, та вони пришли до Бикичу перше зо мну зробиц, як то фахово наволую, „кастинґ”. Опитали ше ми же яки бим єдла рихтала, зняли даскельо кадри у обисцу и у околїску, и гварели жи ме о шицким обвисца. И наисце, явели ми же сом вибрана участвовац у програми. Кед пришли ознова о два тижнї, зняли и приповедку о мнє и о моєй фамелиї, а то вше перша часц каждей емисиї – приповеда Невенка.
О тидзень знїмана и друга, главна часц емисиї. Теди до Бикичу пришли госцински – шейсц жени з рижних подручох Сербиї, хтори, як и Бобальова, вибрани за тоту емисию. Невенка порихтала крачунски и вельконоцни єдла, правда, шицко послуговане по лєтнєй горучави, бо теди було знїманє. На мению ше нашли бобальки, кромплянїки, капущанїки, риба на тепши з рискашу и мачанка з печаркох. Нашу, руску традицийну кухню у мению дополнєли и варена шунка, колбаса и сирец. Праве з того и порихтане предєдло за госцински под назву „Вельконоцна руска рижнородносц”.
– Понеже сом мала досц роботи коло рихтаня єдлох, помагали ми и Лєрка Сокол и єй дзивка Силвия. Шицко було по правилох емисиї, бо дацо могло порихтац и скорей знїманя, алє ше з векшей часци мушело указац и пред камерами, а праве так сом робела бобальки и сирец. Мушела сом повесц и ориґинални, руски назви єдлох, бо ту нєт прекладу. Було и франтованя, окреме кед жени пришли и кед коштовали бобальки, бо таке дацо нїґда нє єдли, та франтовали же тераз им аж ясне чом мойо презвиско праве Бобаль…
КРАСА У ИНШАКИМ
Пракса така же док ґаздиня вари и рихта єдла, госцински одходза з даским обисц край у хторим ше находза, або уж дацо цикаве. Деян Бобаль бул за тото задлужени, та их одведол до Шиду, до Ґалериї малюнкох Сави Шумановича. Госцински видзели и познати портрет хтори тот уметнїк намальовал, а то – „Рускиня у народним облєчиве”. У валалє нащивели и Етно-хижу дзе дознали вецей о Руснацох, бо векшина з нїх нє знали нїч. Опатрали руске облєчиво, мебель, стари фотоґрафиї… Нащивели и Олєярню Владимира Ковача, хтори им виприповедал о продукциї здравого олєю.
Окрем у Бикичу, емисия знята и на Фрушкей гори, на Банстолу, у Миряни Гемун, потим шлїдзела драга до Роґлєва при Неґотину, а домашня була Ґорица Йованович. На „Старей Планини”, у валалє Балтибериловац шицки ше нашли у Надици Чирич, а на Копаонику у „Кривей Реки” при Радици Томич. Знїмане и на Ґолиї у валалє Рудно при Милияни Шеклер, и на концу у Дюрдєвцу при Валєве, дзе домашня була Ґордана Тешанович. Тота жена хтора домашня, вари и рихта док ше шицки нє посходза на полудзенок.
Интересантне було видзиц як кажда з нас оценює домашню кухарку, а так же би гевта цо при нєй нє видзела. На концу, ґу столу приходзи и домашня ґаздиня. Окрем того чи єдло смачне, оценює ше и його автентичносц, и декоровани стол, любезносц домашнїх и инше. Ми нє знаме хто як з нас гласал, бо то орґанизаторе такой позбераю лїстки и вони здаваю оцени. Тото цо наисце краса тей емисиї же кажде з нас, а и патраче дознаю велї интересантносци. Наприклад, людзе при Неґотину под час посту анї рибу нє єдза, бо як гваря, и риба ма крев. На єдним месце сом єдла варену прашецину, а нє печену як при нас, а на Ґолиї, на понад 1 100 метери, продукую хельду. Домашя Милияна нас понукла з палачинками и з хлєбом хтори справела праве з тей муки – приповеда Бобальова.
ПРЕДЛУЖЕЛИ ДРУЖЕНЄ
У емисиї у Бикичу представела ше и Жридлова шпивацка ґрупа „Бикичанки”, а кадри зняти на озеру при Соту. Руска шпиванка одгуковала и у дворе Бобальових кед сцигли шейсц госцински, Боян Бабич женом грал на гармоники, а док ше шпивало помагала и його супруга Драґана Ґлувня Бабич, фахова руководителька жридловей ґрупи.
Невенка госцинским подаровала ЦД Жридловей ґрупи „Бикичанки”, подзелєла им рецепти за бобальки, капущанїки, кромплянїки и сирец. И попри тим же емисиї зняти влєце, емитовани су тей яри. После емисиї о Невенки Бобаль и самим Бикичу було вельо позитивни коментари людзох на Фейсбуку нє лєм зоз Сербиї, алє и зоз державох реґиона, та аж и зоз Швайцарскей, Нємецкей, Америки и Австралиї.
З оглядом же перша сезона „Кухнї мойого краю” спод чиєй назви стої – друженє, путованє, варенє.., була барз удатна, знята и друга сезона и уж ше почала емитовац.
Невенка Бобаль гвари же є задовольна як ше представела, як представела людзом тото цо руске, и край у хторим жиє, приятельох и цалу фамелию. Мило єй же упознала велї нови краї, кухнї, обичаї, а наймилши єй познанства хтори нє преставаю анї теди кед ше погаша камери и рефлектори.
МИЛИЯНА ЗАСЛУЖЕНО ПОБЕДЕЛА
На концу емисиї ше преглашує и побиднїцу, а у тим случаю то була Милияна Шеклер зоз Ґолиї. Вона достала награду од 100 000 динари, а припознанє єй шветочно уручел познати новинар Йован Мемедович.
– Милияна заслужела награду бо то жена хтора уж 30 роки присутна у валалским туризме, а помага єй цала фамелия. Наисце вона свойо богате искуство, схопносц и знанє указала и нам. И други жени ше зложели же Милияна заслужено победзела – гвари Невенка.
