ЛИТМАНОВА (РЕПУБЛИКА СЛОВАЦКА) – У Марийовим святилїщу у Литмановей, на гори Звир у Словацкей, и того року була святочна преслава од першого указаня Богородици безгришней чистоти. На тогорочней програми хтора тирвала од 4 – 5. авґуст участвовал у наш владика кир Георгий Джуджар, на святих Литурґийох, вєдно зоз другима священїками и владиками хтори пришли на тоту святочносц.
Окрем Литурґийох модлєло ше и ружанци, пацерки до Божого Милосердия, швецело ше воду, служело ше молебен, було и цалоноцне бдениє, а о своїм свидоцтве о указаню бешедовала панїматка Кристина. Катехези тримали отец Макс Кашпару и монс. Петер Штурак.
На тей святочносци вирни ше могли висповедац, а у святочней Служби Божей внєдзеню, хтору предводзел владика Ян Бабяк, прешовски архепископ митрополит, було и мированє.