ВОЙВОДИНА – Покраїнски секретарият за урбанизем и защиту животного штредку сообщел же ше од нєшка, 2. авґуста, предлужи з централизовану акцию пирсканя ларвох суньоґох на териториї АП Войводини.
У координованей акциї хтору Секретарият запровадзує зоз Институтом за явне здравє Сербиї „Др Милан Йованович Батут”, утвердзене же нєобходне запровадзиц додатни мири пре застановйованє ширеня горучки заходного Нилу, та ше на териториї АП Войводини опирска 29 700 гектари водовей поверхносци. За тоту намену Покраїнска влада обезпечела додатни 100 милиони динари.
Активносци буду унапрямени на подручя локалних самоуправох на териториї Южного Банату и Южней Бачки, бо ту реґистровани случаї охореня од горучки заходного Нилу.
Перши третмани зоз хемийскима средствами буду окончени коло беґельскей мрежи коло Нового Саду, Бачкей Паланки, Бачу и Бачкого Петровцу, а потим у Ковину, Опову, Вершцу, Билей Церкви, а кед будзе требац, и на других подручйох за хтори ше утвердзи же представяю потенциялну опасносц.