РУСКИ КЕРЕСТУР – Пияток, 23. фебрура, у Ресторану „Червена ружа” науково-фахове викладанє отримал професор новосадского Польопривредного факултету др Жарко Илин котре уж роками традицийно орґанизує рускокерестурске подприємство „Т-пам”. Свойо понуканє представела и осиґуруюца хижа „Дженерали”, a присутни мали нагоду деґустирац и вино з Руского двору.
Проф. др Жарко Илин найвецей часу пошвецел правилному способу гноєня зоз штучнима и орґанскима гноями з отримованьом оптималних пх вредносцох жеми, толкованю як наставаю бактериозни охореня на паприґи, як и благочасовей и адекватней защити, без хаснованя аґресивних, а нє таких ефикасних препаратох.
Попри тим, Илин визначел и значносц микроелементох за пестованє паприґи и на яки способ третирац жем же би вони були у приступней форми за рошлїну, спозорел и на пошлїдки слабей жими, та же тоту ситуацию нє вибалансира анї наиходзаца жимска габа нїзких температурох.
Паприґаре присуствовали и його викладаню „Сучасна продукция желєняви” у Новим Садзе 10. фебруара, кед представел способи знїжованя температури жеми при продукциї желєняви на фолиї, а на тот завод Илин бешедовал лєм о темох и питаньох котри цикавели присутних паприґарох.