ДЮРДЬОВ – Внєдзелю вечар, традицийно на Перши дзень Велькей ноци, члени Културно-уметнїцкого дружтва „Тарас Шевченко” з Дюрдьова пред полну вельку салу Задружного дому отримали Вельконоцни концерт.
У богатей и рижнородней програми наступели члени шицких секцийох Дружтва. Фолклорна секция наступела зоз новима и обновенима танцами, медзи котрима и руски танци з Войводини, Горнїци, Словацки танєц и танци зоз Сербиї з пиротского округу, з Димитровґраду.
Публика мала наогоду послухац руски шпиванки и рецитациї котри ше того року пласовали на покраїнску и зонску смотру. Скеч „Сваха и сват” и того року пририхтали члени драмскей секциї.
Шицки културни и уметнїцки секциї приказали же активни члени шицких возростох добре функционую, цо зоз аплаузами потвердзели патраче и визначни госци.
Спред домашнїх госцох привитал Мирослав Чакан, а присутни були о. Борис Холошняй, о. Михаил Холошняй, посланїцау Народней скупштини Олена Папуґа, предсидатель Општини Жабель Чедомир Божич, предсидатель Скупштини Општини Жабель Радован Чолич, член Општинскей ради Општини Жабель задлужена за културу Нерима Шовлянски, предсидателя НСР Славко Рац, директорка НВУ „Руске слово” Мартица Тамаш и предсидателька Совиту МЗ Душанка Джамбас, як и представителє валалских дружтвох и здруженьох.
Наймладших танєчнїкох и дзецински фолклор за наступ пририхтала Тамара Салаґ зоз Марию Хромиш. Пририхтуюци и виводзацки фолклор Микола и Саня Хромиш, соло шпивачох Сенка Станкович, оркестер Срдян Цуцич и Михал Лїкар, а рецитаторох Яким Гарди. Сценоґрафию прилагодзели дзивки зоз виводзацкей фолклорней ґрупи. Драмску сличку и конферансу написал Яким Чапко, а програму водзели Кристина Горняк и Тарас Чапко.
Орґанизатор Вельконоцного концерта Управни одбор Дружтва, а помогли му Општина Жабель, Национални совит Руснацох и Завод за културу войводянских Руснацох.