НОВИ САД – Вчера, 16. априла, предсидатель Покраїнскей влади Иґор Мирович и подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Михаль Нїлаш, уручели контракти за додзельованю средствох зоз буджету, орґаном и орґанизацийом зоз териториї АП Войводини, у чиїм службеним хаснованю язики и писма националних меншинох.
За тоту намену вкупно обезпечени 9,5 милиони динари хтори по явним конкурсу розпоредзени на 83 орґани и орґанизациї, за едукацию занятих же би хасновали язики националних меншинох, за розвой системи електронскей управи у условийох вецейязичносци, за вецейязични табли з назвами населєньох, улїцох, орґанох и явних обвисценьох, як и за друкованє вецейязичних формуларох и явних публикацийох.
Предсидатель Мирович визначел же опредзельованє тих средствох лєм часц явней политики ґу националним меншином, хтора ше витворює у розличних сеґментох и представя єден з найважнєйших приоритетох Покраїнскей влади. Ґу тому, од юлия у системи роботи покраїнскей администрациї будзе достаточне число прекладательох за потреби посланїкох и служби, и же будзе першираз реализоване прекладанє общих актох на язики националних меншинох.
Подпредсидатель Нїлаш виявел же ше таки конкурс запровадзує уж вецей як 10 роки и же ше, медзи иншим, єдно од 11 поглавйох Акцийного плану за прегваряцке поглавє 23 Републики Сербиї одноши на службене хаснованє язика и писма нациналних меншинох.
По тим Конкурсу средства достали и општински управи у Вербаше (350 000 динари) и Кули (300 000 динари) за трошки виробку и поставянє вецейязичних таблох.
