Ревия парадних запрагох того року отримана першираз на новей локациї, а то при Ловарским доме на терену ОФК „Раднички”. На манифестацию ше одволали 25 запраги зоз Сриму и Мачви. По традициї, шицки учашнїки перше зоз запрагами дефиловали през главни городски улїци, а потим ше врацели на початне место.
Ревию урядово отворел Велимир Ранисавлєвич, предсидатель Скупштини општини Шид, хтори з тей нагоди наглашел же Сримци познати по прихильносци и любови ґу коньом и же и нєшка зачувани стародавни запраги. Вон додал же локална самоуправа потримує отримованє єдней такей манифестациї, хтора зажила у тей часци Сриму.
Учашнїкох и публику, медзи хторима було досц младих и дзецох, привитал и Йовица Степанич, предсидатель КК „Гранїчар 2011” и подзековал локалней самоуправи на потримовки. На ревиї преглашени и найлєпши запраги по катеґорийох. У катеґориї єднозапраги перше место освоєл Милан Степанич зоз КК „Гранїчар 2011” Шид, друге Перица Ґемерин, тиж зоз того Клубу, а треце його клубска колеґиня Ивана Суботич. Кед слово о двозапрагох, перше место освоєл Оґнєн Радованович зоз КК „Еуро Мачва” зоз Боґатичу, друге Ранко Попович зоз КК „Падок” зоз Шашинцох, а треце Никола Ґело тиж зоз КК „Падок”.
У катеґориї тропраги доминировали домашнї зоз КК „Гранїчар 2011” хтори завжали перши три места. Перше место освоєл Дьордє Милинкович, друге Жика Суботич, а треце Йована Степанич.
Награди додзелєни и за найкрасши серсан а награду достал Дьордє Милинкович, КК „Гранїчар 2011”,найкрасшу запрагу мал Милан Беочанин зоз КК „Падок”, найкрасшого вайчака мал Йовица Степанич, КК „Ганїчар 2011”, а найкрасша кобула на ревиї була власнїка Желька Моцка зоз КК „Стари фиякер” зоз Латярку.
За запрагу хтора пришла зоз найодалєншого места преглашена запрага Оґнєна Радовановича зоз КК „Еуро Мачва” зоз Боґатичу, наймладшу запрагу мал Петар Стевич зоз КК „Гранїчар” зоз Кузмину, найстарши кочияш бул Милан Беочанин зоз КК „Падок”, а наймладши кочияш бул Душан Дражич зоз КК „Гранїчар 2011” зоз Шиду.