Место же би предмети хтори ше дакеди каждодньово хасновало у обисцу поодруцали або охабели на милосц и нємилосц часу, накадзи предали хижу у Беркасове, Яким и Нада одлучели принєсц их до Шиду, до свойого обисца. Шицка тота старина нє лєм прикраска у дворе, алє ма и гевту другу, емотивну вредносц.
Добре познате же идентитет єдного народу, окрем язика, писма и вири, и традиция и обичаї хтори ше пестує виками и преноша з колєна на колєно. Так то при велїх народох, та и при Руснацох. Як дахто чува прешлосц пре терашньосц, алє и будучносц, прави приклад малженска пара – Яким и Нада Кечкешово зоз Шиду, обидвойо родом зоз Беркасова.
У Улїци Єлени Четкович, дзе жию, єст велї красни обисца и ушорени двори. Медзитим, Кечкешов двор и обисце заш лєм кус иншаке, нєзвичайне, и наисце красне.
ЯК У ЖИВИМ МУЗЕЮ
Животни простор вони прикрашели зоз старину, односно предметами хтори у прешлосци були часц, так повесц, каждого парастского обисца, и хасновало ше их каждодньово. Нєшка служа уж як лєм прикраска, або як музейни експонати хтори шведоча о прешлих часох.
Кед у Беркасове предата хижа Кечкешових, обок при грекокатолїцкей церкви, Яким тоти предмети принєсол до Шиду и вєдно зоз супругу Наду одлучели же им найду места у їх дворе и на веранди.
– Шицки тоти предмети хасновани у нашим обисцу и добре их паметам як дзецко, так же ме на єден способ здогадую на дзецинство. Кед ше хижу предало, подумал сом же би була велька чкода шицко зохабиц же би препадло, бо кому тоти предмети нєшка ище потребни? – роздумує Яким и предлужує же ше и супруга Нада такой зложела же би шицко зачували. Нєшка ше цеши же зачувал и пресу за грозно, хтору барз давно ище Нємец справел.
– Добре паметам же ю хасновал мой дїдо, а вец ю нашлїдзел оцец. Грозно ше пресовало кед ше продуковало вино, и пресу теди велї у обисцу мали, окреме Сримци. Нєшка, ниа, тота преса лєм прикрашує двор у хторим єст надосц вшелїякого квеца и желєнїдла, и вона уж одслужела свой роботни вик – гвари наш собешеднїк.
А дзе винїца, там обовязно муши буц и шприцла за пирсканє виновей лози, та єдна така тиж виложена у дворе. Добре познате и тото же у каждим обисцу у хторим було вина, мушело буц и древени гордови дзе ше чувало вино през цали рок. И таки гордови зачувани у Надовим и Якимовим доме.
И ОФАРБИЦ ТРЕБА ЗНАЦ
Обисце дакеди нє мож було задумац без видлох, рошти, мирици, коршовох за воду, кантички за млєко, осла, лавки, а у кухнї танєрох хтори вишели на муре. Дзе шицко тото, там и чобольов хтори тиж шведок часох за нами, нажаль, уж лєм у памяткох.
Нада барз креативна и велї предмети хтори зоз супругом одняла од забуца, оплеменєла и дала им якуш уметнїцку ноту.
– Любим мальовац и рисовац так же сом, наприклад, руски танєр прикрашела з квециками, офарбела шольочки хтори тримам у старим креденцу, на веранди. И велї други предмети зме так аранжировали же би шицко крашнє випатрало. Тота старина тераз каждодньово пред нашим очми и цешиме ше же є ту. Руска лавка уж була досц стара, алє зме пре простор з єдней справели два, хтори тиж офарбени, а ту и стол на хтори з часу на час положим руски парток – гвари Нада.
„Виставу старих предметох” у їх дворе велї з валалу замерковали и похвалєли, окреме же у тим нєзвичайним обисцу квеце и желєнїдло злучени зоз старима предметами дава окремну красу. А док придзе єшень, Кечкешово шицко поодкладаю под закрице, дзе шицко остава по яр. Вец ознова кажди предмет будзе мац свойо место.
– Нєшкайши млади ґенерациї нє знаю за векшину предметох хтори ше нє так давно хасновало у обисцу, бо ше нєшка иншак жиє. Ми одлучели зачувац голєм часц тей нашей традициї хтора нам нє лєм прикраска у дворе, алє и мили памятки – гварели нам на концу Яким и Нада.
ШЛЄБОДНИ ЧАС КРЕАТИВНО ВИПОЛНЄТИ
И Яким и Нада нєшка маю надосц шлєбодного часу, бо су пензионере и креативно и хасновито го препровадзую. Роками Яким робел у ДДОР-у, а Нада у Фонду за здравство.
Нєшка, з часу на час нащивя сина и дзивку у Новим Садзе, а Нада окреме активна у КПД „Дюра Киш” як шпивачка. Окрем пестованя квеца, прави прикраски, шкатули и кошарки зоз паперу и по тим є тиж позната.
