Малюнки по котрих Обровски познати то стилизовани форми животиньох, тукан, носороґ, слон… на котри ше вон припатра скулпторски, а материялизовани су з нє типичнима материялами у малярстве. Тиж так, за ньго мож повесц же го од формох у подобовей уметносци найбаржей прицагує благи релєф.
Иґор Обровски дипломовал на Академиї уметносцох у Новим Садзе 2004. року и нєшка роби як сценоґраф на РТВ Войводини, а паралелно ше занїма и зоз малярством. Йому уметносц и робота и фах, и з ню виполнює и свой шлєбодни час. У 2014. року Обровски достал награду Телевизиї Войводини за сценоґрафию.
Иґорова фамелия по походзеню зоз Руского Керестура, його оцец Иван Обровски познати войводянски макетар, а його брат Коля тиж так подобови уметнїк. Як гвари, одмалючка малює, бо му дома вше були доступни рижни клайбаси, фарби, а одушевйовал ше зоз єдним французким приручнїком, по хторим ше учело рисовац. Зоз Иґором Обровским бешедовали зме о уметносци и анґажованю уметнїка у нєшкайшим чаше.
РС Кельо важни анґажман уметнїка нєшка?
– Анґажман уметнїка вше бул важни, бо уметносц шицко гевто цо нас каждодньово окружує. Задумайце живот, поведзме, без шматох або меблю, наша каждодньовосц пребогата зоз стварами котри уметнїцки дизайновани.
РС Кельо уметнїк може вплївовац на стварносц же би швет коло нас бул лєпши?
– Уметнїк зоз свою роботу вплївує на швет коло себе. Зоз свою активносцу пробує дац одвити на хвилькову и можлїву ситуацию и дава ришеня за злєпшанє перцепциї стварох коло нас. Уметносц ше нєпреривно розвива и злєпшує, а з новима технїчнїма одкрицами постала доступна шицким и праве прето нєшка маме множество рижних ришеньох у сфери дизайна, дзе форма и функционалносц маю основне значенє. Обидва, и форма, и функционалносц подєднак важни.
РС Чи уметнїк критичар часу?
– Задаток уметнїка же би критиковал и превипитовал час у котрим жиє. Тот анґажман би требало виражовац на найпрофанши способ. Уметнїк зоз свою роботу муши дїйствовац на стварносц же би творел добрейши, лєпши и успишнєйши швет.
РС У своїм твореню хаснуєце рижни материяли, чи у тим заступена и розлична жанровска опредзелєносц?
– Пред даскельома роками сом наисце бул окупировани зоз велїма темами, алє сом, тиж так, мал розлични толкованя уметнїцкого дїла през розлични материяли. Давно тота форма пречисцена, а достала и яснєйшу форму. Заш лєм, през тоту розличитосц сом здобул искуство, хторе ми помогло же бим ше уметнїцки виражел на найлєпши способ, же бим виражел гевто цо наисце жадам витвориц.
Уж даскельо роки ме „трима” идея же у тим твореню хаснуєм материяли котри нє типични за тоту файту уметносци, як наприклад одредзени файти будовательного материялу, розлични файти лїпкача и металу, писок…
Тота преокупация настала як резултат преучованя пещерского малярства яке поведзме гевто у шпаньолскей Алтамири. У тим малярстве форма на єден примитивни, алє стилизовани способ, приказана як символ, як знак. Тедишнїм уметнїком було вельо лєгчейше же би з помоцу символики, указали на даяку тему або знак.
У тей худобносци рисунку и богатим опису єдней форми пренашол сом свою драгу. Прето у остатнїм чаше и робим стилизовани форми птицох, а у тей стилизациї ше находзи цали єден швет тактилного, пещерского, анималного и абстрактного хторе ношим у себе.
РС Цо за Вас уметносц? Чи вона одраз стварносци, чи уметнїковей особносци?
– Обєдинює обидва, и обидва подєднак важни. Уметнїк, вшелїяк, уникатна подоба, як и шицки други людзе и од його перцепциї живота завиша резултати його роботи.
РС Дзе черпаце свою инспирацию?
– Природа нєвичерпне жридло инспирациї. Тото цо природа витворела, то нєвироятне. Природа дава ришенє за шицко, напр. и за штучну интелиґенцию. Животинї випатраю прекрашнє и зоз своїм випатрунком ме прицагую, алє уметнїк ма задаток же би видзене приказал на нєвидзени способ, зоз свойого ракурсу патреня, на свой способ.
РС Чи за уметнїка важне же би мал свой препознатлїви, ориґинални „рукопис”?
– Вшелїяк же важне, то гевто цо го видвоює од других и по чим видно кельо уметнїк ориґинални.
РС Цо сце на уметнїцким полю робели за Руснацох?
– Робел сом за Руски народни театер „Петро Ризнич Дядя” зоз Руского Керестура дизайн сцени за два театрални представи, „Важне буц озбильни” Оскара Вайдла у режиї Владимира Надьа Ачима и за „Страдию” Радоя Домановича у режиї Вої Солдатовича.
РС Дзе сце викладали свойо роботи и як то випатра у швеце, вельо озбильнєйше, лєпше?
– У Амстердаму сом ше представел на колективней вистави вєдно зоз даскелїма уметнїками зоз бувшей Югославиї. Красне искуство сом дожил у Будапешту дзе сом мал єдну колективну и два самостойни вистави. Там сом достал велї добри критики, а мойо роботи ше пачели и критики, и публики, и новинаром котри провадза подобови живот у Мадярскей.
