Стретнуце ветеранох ФК „Славия”

автор люр
1.2k Опатрене

Концом прешлого мешаца по шести раз за шором позберали ше фодбалере хтори бавели за новоораховску Славию у чаше од 1976. по 1985. рок. Як и каждого, и того року одбавене єдно змаганє – два раз по 30 минути. Присутни ше на початку змаганя подзелєли на два екипи, а потим нєт правила хто бави за котри бок важне же би обидва екипи мали єднаке число бавячох. По одбавеним змаганю у ловарским доме ше орґанизовало вечеру и друженє.

Тибор Леп за Славию бранєл мрежу полни дзевец роки и праве дзекуюци йому стретнуце ше и орґанизує.

– Кед  2004. року умар Имре Церна котри длуго роки бавел зоз нами, а бул нам єден час и тренер, пробовал сом зволац дакедишнїх бавячох же бизме одбавели єдно змаганє, а векшина поволаних и пришли – гвари Тибор. Зишли зме ше ище два раз, а потим єден час ше то претаргло. Алє од 2012. року кажди рок концом мая ше позбераме у Новим Орахове. Маме и спонзора котри нам помогнє же би ше тоти стретнуца поряднє отримовало.

Можем повесц же од екипох котри теди бавели у суботицкей лиґи лєм ми орґанизуєме таке стретнуце. Нажаль, каждого року нас єст вше менєй, алє думам же ше ище велї роки будземе сходзиц, та гоч зме анї нє годни одбавиц змаганє.

На стретнуце ветеранох вше поволани и дакедишнї бавячки Кошаркашского клуба ,,Славия”. Женска кошарка у Новим Орахове седемдзешатих и початком осемдзешатих рокох була барз популарна. Дзивчата требали войсц до Войводянскей лиґи, алє понеже нє мали условия, мушели место препущиц другей екипи. Славица Копас ше здогадує:

 – Кошарку сом бавела 10 роки. Мали зме вельо талантовани бавячки, а тренер нам бул Имре Илиш зоз Бачкей Тополї. Док зме ше змагали у Општинскей лиґи нє було проблеми, алє кед зме требали войсц до висшей лиґи ясне нам було же нє маме условия на тренинґи, бо требало ходзиц до Бачкей Тополї. Нажаль, после того, у валалє ше престало бавиц кошарку.

ПОВЯЗАНИ ТЕКСТИ