Погосцительство у малим стредку, як и валалски туризем остатнї даскельо роки ше промовує у Сербиї, у надїї же ожию валали и мали места, и же млади буду оставац на валалє, а туристи их обиходзиц. Нєдостаток роботи на валалє єдна зоз причинох прецо млади одходза до векших городох. Мария и Стеван праве у Коцуре надумали порушац свой бизнис, погосцительни обєкт же би себе обезпечели роботу и остали жиц на валалє.
У Коцуре велї роки успишно робел ресторан „Бачки полудзенок”, котри госцом понукал смачне єдзенє, етно амбиєнт и приємну музику под час полудзенку або вечери, алє на нєщесце тих котри любели нащивйовац тот ресторан, вон пре одредзени причини престал робиц.
Пред роком двойо млади, леґинь и дзивка, надумали на другей локациї отвориц таки ресторан под истим меном. Мария Русковски и Стеван Самочета уж мали искуства у заєднїцкей роботи, понеже вєдно участвовали у велїх акцийох котри порушани у Коцуре, та ше жадали опробовац и у погосцительстве.
– Идея пришла спонтано, бувши власнїк дакедишнього „Бачкого полудзенку”, Марийов оцец Янко, предложел нам же бизме пробовали ожиц тот ресторан и ми подумали, чом нє? Нам хибело место дзе бизме ше сходзели, по валалє могло чуц же хиби тот ресторан, та зме нашли празни локал, и видзело нам ше же добра идея таке дацо ожиц у Коцуре – виприповедал Стеван.
У Коцуре, „Бачки полудзенок“ бул, а и тераз є єдини ресторан котри понука варени єдзеня, котри и смачни и прицагує велїх котри лєм преходза през Коцур, же би ше кратко затримали у валалє, голєм пре даяке смачне єдзенє, за початок.
Погосцительни обєкти у Коцуре понукаю домашнї сладоляд, аж у двох цукрарньох, швидке єдзенє и сладоляд у єдним клубу и комплетни мени у ресторану „Бачки полудзенок”.
Дакеди робел и ресторан на беґелю, котри тиж понукал интересантни мени, алє нє обстал.
НА ПОЧАТКУ ПОМОЦ БУЛА БАРЗ ПОТРЕБНА
Млади котри порушали тот бизнис, вошли до погосцительства у малим стредку, знали же нє будзе лєгко, алє мали потримовку, як од родичох, так и од родзини.
– Понеже мой оцец мал искуства у погосцительстве, вельо нам помогнул коло паперох котри було потребне пополнїц, придац и порушац єден ресторан. Учели зме константно, през роботу и праксу – гвари Мария и додава – алє ми маме щесца и же маме и клальню и месарню, та вше маме швиже месо, можеме го предавац по набавней цени, и конкурентни зме на тарґовищу а и нє мушиме о тим окреме водзиц рахунку.
У менших местох, а окреме на валалє, фамелиї нє маю звикнуце одходзиц до ресторану на полудзенок або вечеру, алє заш лєм любя поручиц зоз ресторану дацо на ложку, або роштиль.
– Точно же Коцурци, а окреме старши, нє маю звикнуце ходзиц до ресторану раз мешачно, або без даякей окремней причини, алє за даяке „славлє”, любя поручиц даяки мени котри ми пририхтаме а вони однєшу дому своїм госцом. Тиж так, тот наш простор ше хаснує, поведзме за полудзенок после першей причасци, за свадзби, кресцини, як и обеди, або за дїловни полудзенки и вечери. А приходза нам госци и зоз Нового Саду, Змаєва, Вербасу и других местох котри у преходзе и жадаю поєсц дацо смачне – гвари Стеван.
Гоч у Коцуре єст три сали за видванє у котрих ше орґанизує векши преслави, як цо то свадзби, кресцини и родзени днї, алє котри треба резервовац вельо скорей, предносц ресторана же роби кажди дзень и вше мож присц, лєм кед у питаню векше „славє” потребно ше на час наявиц же би ше анґажовало векше число роботнїкох у кухнї, або у сали.
– У ресторану заняти млади особи, понеже нам було важне же бизме позберали екипу зоз котру ше розумиме, же бизме були шицки на „истих габох”. З другого боку, патрели зме же би млади робели, и же би им то дало причину остац ту у валалє и привредзовац – визначели Мария и Стеван, котри тиж жадаю остац на валалє и ту робиц.
ЦЕНА МОЖЕ ПРИЦАГНУЦ, АБО ОДБИЦ ГОСЦА
Млади котри ше школую за кухарох, келнерох и менаджерох, найчастейше роботу глєдаю у векшим городзе дзе єст вельо вецей вибору, алє и вецей трошки за живот у городзе, окреме кед треба плациц квартель, и подобне. Домашнї, млади Коцурци у предносци же жию ту, же им сцигнуц на роботу нє треба вельо часу и же им шицко блїзко и на єдним месце. Алє плаци у валалє нє можу буц таки яки су у городзе, бо ше ґаздови нє виплаци, бо и цени у ресторану вельо нїзши як у городзе.
– Патриме же би нашо роботнїки були задовольни, кельо можеме тельо их и плациме. Чежко на початку розвиваня даякого бизнису сцигнуц и до початней точки. Нам ше то удало после рока роботи, алє то лєм прето же зме мали вельо того обезпеченого зоз предходного ресторану, та зме велї ствари нє мушели куповац. Иншак, велї ствари и роботи „нєвидлїви”. Кед ше почина роботу, вше єст укладаня, а уклада ше и после до розвитого бизнису. Були зме порихтани на тото и думам же ше добре ношиме з тим – визначує Самочета.
АМБИЦИЙНИ СТУДЕНТИ
Стеван закончує студиї на факултету за физичну културу, алє покля нє дойдзе до дипломи, активни є у младежским Здруженю „КУМ”, дзе є и предсидатель, а роками бул у орґанизациї Акциї „Дай и ти свою руку”, а Мария закончує фармацеутски факултет. У погосцительстве су, и любели би остац ту, алє и найсц роботи у фаху, та робиц и єдно и друге. Живот укаже як будзе найлєпше.
– Млади зме, маме енерґиї, тот найчежши рок за ресторан прешол, кед зме мали вельо трошки и укладаня до обєкту, та тераз треба лєм отримовац стан таки яки є, през нови идеї и зоз квалитетним понукнуцом буц конкурентни на тарґовищу – гвари Стеван.
Самочета, штири роки бул и одборнїк у Скупштини општини Вербас, алє му тота обовязка одберала вельо часу, та тоту функцию напущел по вицеканю мандату.
Як предсидатель Коцурского здруженя младих „КУМ” зоз членами Здруженя конкуровали на велї адреси же би достали средства за отримованє традицийней волонтерскей Акциї, алє того лєта им ше то нє поспишело. Добре познате же Акция проєкт котри прицаговал младих зоз цалей Сербиї до Коцура, та вони нє одуставаю, наздаваю ше и кед достаню даяки пенєж, буду акцию орґанизовац на єшень, або на жиму.
ТУРИЗЕМ И ТРАДИЦИЯ
Стеваново вельке жаданє же би ше порушало У Коцуре туризем, же би валал указал цо ма, же би ше за ньго чуло и же би єдного дня дахто пожадал ту присц и обисц тото цо тот мултинационални валал понука, нє лєм кед слово о єдзеню, алє и култури и традициї народох котри ту жию.