БЕОҐРАД – З планом Министерства привреди було предвидзене обезпечиц роботу за 12 383 роботнїкох, през 72 проєкти за субвенционованє подприємствох у Сербиї. Обезпечени три раз вецей роботни места, виявел державни секретар у Министерству привреди Драґан Стеванович.
З нову Уредбу виєдначени и домашнї и иножемни инвеститоре, та и мали инвеститоре зоз Сербиї можу конкуровац за субвенциї.
– Субвенциї можу достац шицки котри уложа 100 000 еври и обезпеча роботу за найменєй дзешецерих – прецизирал Стеванович.
Окремна увага при стимулованю пошвецена польопривреди и рибарству, а з Уредбу нє облапени проєкти котри ше занїмаю з розвойом софтверского инжинєрства.
Нова Уредба важна за нєрозвити часци Сербиї, понеже инвеститоре у тих часцох можу достац субвенциї до 7 000 еври за новоотворене роботне место, док найвецей 3 000 еври за исте у розвитих општинох – наведол Стеванович.
Податки з Министерства привреди гуторя же од прилапйованя Закону о укладаньох 2015. року по нєшка, подписани 42 контракти о субвенцийох, пейц з домашнїма и 37 з иножемнима инвеститорами, а цалосна вредносц додзелєних средствох векша як 164 милиони еври.