КАНАДА – Тих дньох зоз друку вишла двоязична кнїжка панї др Мишел Парвенски „Шлїдом наших предкох” („In the footsteps of our ancestors”).
У кнїжки записи др Мишeл Парвeнски, амeрицкей Русинки, котри наставали каждого лєта од 1997. року путуюци по Европи и Горнїци, и виглєдуюци руски древени церкви. З тих путованьох з часу на час писала репортажи, интересантни интервюи зоз познатшима Русинами хторих стретла, або драгописни призначки за часопис „Руснаци у швеце”. До кнїжки вошли шицки єй написи обявени од 2002. по 2013. рок у „Руснаци у швеце”.
У кнїжки обявени єй 12 драгописни репортажи або интервюи хтори настали на драги по Лемковини (Польска), восточней Словацкей, по Закарпат’ю (Україна), Румуниї, Мадярскей и Войводини. Панї Парвенски два раз пребувала у Руским Керестуре и була одушевена и зоз жителями и зоз тим цо видзела у валалє, а о чим пише у двох репортажох.
Дзекуюци єй стилу писаня и приступу ґу темом, шицки написи и нєшка актуални. Илустровани су преважно зоз єй авторскима фотоґрафиями або за потреби написох обезпечела фотоґрафиї з релевантних жридлох.
Кнїжка двоязична, исти текст по анґлийски и по руски паралелно друковани. Лєм фотоґрафиї розлични з подписами на анґлийским и руским язику.
Кнїжку видал Русински видавательни центер у Канади. Друкована є у колор-технїки, тираж 400 прикладнїки, ма 160 боки, формат 165х225 мм, богато є илустрована з фотоґрафиями, мапами и илустрациями.
За дистрибуцию у Войводини предвидзени лєм пар дзешатки прикладнїки тей кнїжки. Цена кнїжки 680 динари. Заинтересовани ше за деталї можу розпитац на имейл꞉ gkoljesar@gmail.com.