КОЦУР – Пияток, 13. априла, у Месней заєднїци у Коцуре, Завод за ровноправносц полох „Унапрямена информованосц женох о єднаким приступу здравственим услугом и елиминованю дискриминациї женох у обласци здравственей защити” отримал трибину на котрей участвовали директорка Заводу за ровноправносц полох Диана Милович, помоцнїк покраїнского секретара за социялну политику, демоґрафию и ровноправносц полох Предраґ Радович и Даница Драґнич специялисткиня за ґинеколоґию и акушерство Общого шпиталю Вербас.
Директорка Заводу Диана Милович присутних упозала зоз роботу Заводу за ровноправносц полох, на котри способ мож ришиц дзепоєдни проблеми и визначела же жени на валалє нєдостаточно информовани о здравственей защити и своїх правох.
Помоцнїк покраїнского секретара за социялну политику, демоґрафию и ровноправносц полох Предраґ Радович гварел же мисия Покраїнского секретарияту за социялни питаня же би ше змоцнєло шицких слабих и помогли тим котрим помоц нєобходна. Присутни жени од Радовича дознали же, у случаю кед ше специялистични препатрунок нє може окочиц у периодзе од мешаца, вец пациєнт ма право глєдац потвердзенє о тим и зоз тим потвердзеньом пойсц на приватни препатрунок и зоз фискалним рахунком пойсц до Републичного фонду за здравствене осиґуранє и рефундовац потрошени пенєж.
Специялисткиня за ґинеколоґию и акушерство Даница Драґнич присутним женом пояшнєла же прецо барз значне поряднє окончовац превентивни ґинеколоґийни препатрунки, и то праве теди кед нєт нїяки симптоми, бо ше лєм на час велї одкрити хороти можу успишно вилїчиц.
