НОВИ САД – У тогорочним 51. чишлє новинох „Руске слово” пред читачами крачунска винчованка кир Георгия Джуджара, а у рубрики „Тижньовнїк”, медзи иншим, пише о роботи совитох за медзинационални одношеня по локалних самоуправох.
У рубрики „Нашо места”, окрем других висткох, пише о хаснованю кружних цекох у транспорту, а „Економия” о стану у керестурских рибаловох и о конкурованю за средства зоз ИПАРД фонду.
„Култура и просвита” дава звити з Литературного вечара младих у Дюрдьове и програмох у рамикох манифестациї Днї Миколи М. Кочиша у Кули и Новим Орахове, а спатра и календар наших репрезентативних манифестацийох, док на бокох рубрики „Людзе, роки, живот” нове предлуженє фельтону „Як (нє) скапал рокенрол”.
„Духовни живот” на своїх бокох преноши як дочекани св. Миколай по наших парохийох, а пише и о Гуманитарним концерту у Руским Керестуре и Крачунским вашаре у Коцуре. „Спорт” зазначел нови успих кик боксера Любу Яловия з Вербасу, а анализує и яки условия тренираня през жиму у завартим маю нашо спортисти.
У тим чишлє вишли два додатки – „Руске словечко” и „Дом и фамелия”, дзе и нове предлуженє „Женоблоґиї”.