НОВИ САД – Дзевяте тогорочне число новинох „Руске слово” у рубрики „Тижньовнїк” пише о схадзкох Рускей матки и Предсидательства СФУЛО, а зазначена и робота Совиту за медзинационални одношеня у општини Жабель.
Рубрика „Нашо места” информує о схадзки керестурских огньогасцох, здруженя пензионерох у Вербаше, Совиту Месней заєднїци Руски Керестур, док „Економия” представя фамелию Маркович з Ґосподїнцох хтори предаваю продукти з наду. Ту и совити о орезованю овоцнїкох и винїцох.
„Култура и просвита” звекшого зазначела як означени Медзинародни дзень мацеринского язика у школох у Руским Керестуре, Коцуре и Дюрдьове, а ту и звит зоз Сайма образованя у Вербаше.
На бокох рубрики „Людзе, роки, живот” фельтон вочи 50. Драмскому мемориялу Петра Ризнича Дядї, як и здогадованя сучашнїкох на ньго. На тих бокох читаче можу упознац и др Михайла Лїкара.
На „Духовним живоце” длуго очекована церковна статистика з наших парохийох, а „Спорт” пише о пририхтованьох спортских клубох за ярню часц першенства и змаганя у билияру у рамикох Спортских бавискох „Яша Баков”.
Додаток у тим чишлє „Литературне слово”.