НОВИ САД – У трицец другим тогорочним чишлє новинох „Руске слово” у „Тижньовнїку” спатрена инициятива за нови гранїчни преход у Сриме спрам Горватскей, а на „Наших местох”, медзи иншим, пише о ушорйованю Дюрдьова и Руского Керестура, док „Економия” анализує чи ше виплаци продуковац карфиол.
„Култура и просвита” зазначела упечатки зоз Манифестациї жридловей фолклорней творчосци Руснацох „Коцурска жатва”, зоз Литературно-музичного стретнуца младих у Керестуре и Подобовей колониї Месней заєднїци Дюрдьов.
На бокох рубрики „Людзе, роки, живот” читаче можу упознац Даницу Гирйоватий зоз Шиду и Ксению Рац з Вербасу, док „Духовни живот”, медзи иншим, зазначел роботи у ґосподїнскей церкви.
Рубрика „Спорт” информує о законченю Ноцного турнира у малим фодбалу у Руским Керестуре и Турнира улїцох у Ґосподїнцох, а дати и звит зоз Турнира у вельким фодбалу у рамикох Спорстких бавискох „Яша Баков”.
И у тим чишлє вишла рубрика з рецептами „Хладок и горуци тепши”, а як додаток „Дикица”.