НОВИ САД – Трицец треце тогорочне число новинох „Руске слово” у „Тижньовнїку” пише о нащиви предсидателя Сербиї Александра Вучича Општини Шид и о едукациї младих Руснацох у Коцуре, док „Нашо места”, медзи иншим, преноша як ше дюрдьовске КУД „Тарас Шевченко” пририхтує за наиходзаци Фестивал „Най ше нє забудзе”.
На бокох „Економиї” пише як Здруженє женох „Бикичанки” предава маджун прейґ интернету, а зазначене и як прешла тлачидба слунечнїку у коцурским и керестурским хотаре. Ту и розгварка зоз Джуджарову фамелию з Керестура хтора позната по продукциї бостану.
„Култура и просвита” информує о госцованю КУД „Жатва” у України, а ту и напис о самостойней вистави малюнкох вербаского уметнїка Влади Нярадия у Руми, и о авторови Петрови Дешичови котри пририхтує фото-моноґрафию о Руснацох.
Рубрика „Мозаїк” провадзела гуманитарни „Харт рок фест” у Вербаше, а „Людзе, роки, живот” приблїжели читачом яки упечатки Мария и Михаїл Римарово принєсли зоз Дженфеста у Манили на Филипинох, а представена и Хедєшова фамелия з Малого Лошиню.
„Духовни живот” зазначел як було на Водицовим кампу и дати звит зоз Ґенералней скупштини екуменского форума християнкох Европи на хторим участвовали и нашо парохиянки.
Рубрика „Спорт” информує о початку Турнира у кошарки 3 на 3, о Турниру фирмох и конїцких обегованьох у Керестуре, як и о пририхтованьох наших фодбалских клубох за нову першенствену сезону. При концу новинох и рубрика з рецептами „Хладок и горуци тепши”, а як додаток вишло „Руске слово у швеце”.