Два премиєри исти вечар – „Ковалє” у Керестуре и „Бабушка” у Новим Садзе. Два Ачимово премиєри за два викенди – „Жени” 10. марца и „Ковалє” на отвераню Мемориялу. Два улоги Ребеки Планчак одбавени дзень за дньом – пияток у „Бабушки”, такой всоботу у „Женох”. Врацанє єдного з наших перших ґлумцох-аматерох Дюру Латяка на сцену у „Бабушки”. Маестрални Балащак знова пред керестурску публику, як и автор „Ковальох” Милош Николич и фамелия и потомки Петра Ризнича Дядї на отвераню… Ґу тому, полна „дзецинска програма” – по єдна представа за дзеци зоз Керестура, Дюрдьова и Шиду, и аж три зоз Коцура… шицко тото случовало ше вочи, паралелно и на самим початку ювилейного 50. Драмского мемориялу Петра Ризнича Дядї хтори прешлого викенду почал у Руским Керестуре, а зависи спущи у викенду пред нами.
И шицко то добре, бо голєм през тот кратки час театер наисце жиє при Руснацох, явно, манифестно и нєскрито, и достава увагу яку заслужує тот найкомплекснєйши литературни вислов. Шицко тото тиж допринєсло най голєм запахнє фестивалска атмосфера яка би у даєдних других и даяких за културу щешлївших часох сиґурно провадзела ювилейни Мемориял.
Нажаль, Мемориял у тим виданю остал без „Духновичовцох” зоз Прешова, гоч по сам початок пробоване обезпечиц госцованє углядного ансамблу хтори на вецей заводи послужел як модел, алє и партнер нашого театру. Кед уж того року нє будземе патриц „наших” з Горнїци, нє проблем, бо озда приду нарок, лєбо рок по тим. Прави проблем же анї того року у селекциї за одроснутих публика Мемориялу нє ма нагоду паатриц наших аматерох з Дюрдьова, Вербасу, Сриму… Кед же уж конкурс Националного совиту за стимулованє дзецинского театру, правда, скоро символични алє систематично обдумани, уж дава резултати по наших местох хтори видлїви у дзецинскей часци Мемориялу, чи би подобни модел нє могло обдумац и за старших?
Нєреалне обчековац же ше за єдну сезону так зобудза шицки локални сцени, понеже ту укладаня муша буц озбильнєйши. Медзитим, даяки циклични конкурс дзе ше кажди рок други штредок, ансамбл и режисер буду цильовано дотирац же би поставели драмски фалат по руски, лєбо голєм дїло руского автора за Мемориял, могол би буц крочай у добрим напряме.