Фодбал го провадзи цали живот

автор злк
978 Опатрене

Спорт, а окреме фодбал, у остатнїх  пейдзешат рокох ше пременєл, а пременєли ше  и фодбалере. То постал спорт на котри ше патри як на добри бизнис, зоз котрого мож вельо заробиц кед ше бавяча добре „преда”. Дакеди було важне добре бавиц, дружиц ше, и аж вец победзиц.

Юлиян Загорянски зоз Коцура, котрого велї паметаю и як коцурского Ґаринчу, фодбал полюбел одмалючка, кед ше лабди ище правелo зоз старих рендох.

– Прицаговало ме тото бависко, накадзи сом збачел лабду, або цошка цо здабало на „нєшкайшу” лабду. Теди лабда була зоз старих рендох и анї приблїжно нє випатрала так як нєшка випатра фодбалска лабда, алє нам, дзецом, то нє завадзало, була нам одлична! Направели зме екипу, ми хлапци, зоз улїчки, приходзели и зоз сушедних улїчкох и бавели зме прекрасни фодбал. Паметам же зме бавели боси и по праху – здогадує ше 75-рочни Юлиян.

ЗА ЛАБДУ БЕГАЛИ, ДОК НЄ ПОПАДАЛИ

Першу, праву фодбалску лабду Юлиян достал од оца у шестей класи, и то була єдна зоз перших фодбалских лабдох котра сцигла до Коцура.

– Бавели зме вец уж „прави” фодбал на пажици, каждей нєдзелї, було нас и по двацец, и старши и младши хлапци и бавели зме фодбал док зме нє попадали з ногох. Кед сом бул 8. класа отримовало ше стретнуце школох у шаху и фодбалу. Паметам же зме перше победзели школу з Дюрдьова зоз 6:3, а потим и школу з Руского Керестура зоз 12:3.  Теди сом дал дзевец ґоли и ту ме замерковали тренере зоз Искри и анґажовали ме же бим почал бавиц за Искру – памета  Юлиян.

Медзитим, школованє Юлияна, вєшенї истого року, одведло до Зомбора до стреднєй польопривредней школи, та ше за Искру анї нє сцигол реґистровац, алє ше реґистровал до Зомборского клубу „Жак” котри бул у Сиверно-бачкей лиґи.

– У „Жаку” сом єден рок бавел за подросток и вец ме одведли на систематски препатрунок же бим достал дошлєбодзенє бавиц за перши тим, бо теди було правило же нїхто хто нє ма 18  роки нє може бавиц у першим тиму. Достал сом тото дошлєбодзенє, почал сом бавиц за перши тим и бул сом на позициї полутки. Три роки сом бавел за ФК „Жак” и шицки три роки зме були перши у своєй лиґи и теди сом озбильно роздумовал пошвециц ше спортскей кариєри – гвари Загорянски.

Бошко Бокан, Юлин Загорянски, Владо Югас, Миле Дражич и Воя Неделькович – напад Искри

Бошко Бокан, Юлин Загорянски, Владо Югас, Миле Дражич и Воя Неделькович – напад Искри

ЛЄТО ПРЕСУДЗЕЛО КАРИЄРУ

Лєто после законченей стреднєй польопривредней школи було пресудне за Юлияна котри надумал уписац студиї физичного воспитаня, односно ДИФ, котри теди бул лєм у Беоґрадзе.

– Наш познати фодбалер Яким Киме Виславски зоз Вербасу и я ше познали праве зоз тих фодбалских змаганьох, а вон теди уж бул у Партизану и волал ме най придзем на тренинґ, бо ме вон уж препоручел свойому тренерови зоз Партизану. И пошол сом першого авґуста зоз братом на догварку. Бул сом швидки на терену, добре сом бавел зоз главу и добре сом ше там указал. Догварка була же бим ше явел о петнац днї и же бим пришол на тренинґ и пририхтованє за факултет. Исти дзень, кед я бул на догварки, бул и Мустафа Хасанаґич, котри вец и бавел за Партизан, алє и за вельо познатши клуби – гвари Загорянски.

Полни ентузиязма и щесца же вообще забави фодбал у Партизану и зоз велькима менами у тим спорту, Юлияна виполньовало зоз радосцу, алє вец ше случело пресудне покалїченє.

– Даскельо днї после мойого приходу зоз Беоґраду, стретнул сом екипу Искри котра на бициґлох ишла на змаганє до Вербасу и волали ме най придзем з нїма. Любел сом фодбал и гоч сом нє мал у плану пойсц, пошол сом. У перших 10. минутох дал сом перши ґол и чул сом же як двоме зоз процивней екипи бешедую же ме треба „зредзиц”, и нєодлуга ме єден подбил, спаднул сом нєзґодно на лїву руку и зоз змаганя ше врацел у ґипсу- здогадує ше Юлиян.

У фамелиї дзе фодбал бул лєм гоби, або пополньованє шлєбодного часу, за родичох було нє реалне занїманє буц фодбалер, а окреме после того покалїченя, дзе регабилитация ишла помали и наисце требало вельо часу же би ше рука загоєла.

– Покалїченє, односно кед сом зламал руку того лєта було пресудне же сом занавше одустал од студийох ДИФ-у и спортскей кариєри у тим смислу, и вецей нїґда сом ше нє явел до Партизану. После сом стретнул Кима Виславския котри ми гварел же сом погришел, же сом заш лєм требал присц и зоз зламану руку, же сом нє требал одустац, алє теди уж було позно, я уж бул студент на польопривреди – гвари Юлиян.

ДРУГИ ПОЛЧАС

Тей єшенї, кед препадли и студиї ДИФ-у и анґажман у Партизану, Юлиян ше уписал на Польопривредни факултет у Новим Садзе и о даскельо роки постал инженєр аґрономиї.

– Перши рок, под час студийох нє бавел сом фодбал, бо сом цагал и далєй тот проблем зоз руку, алє уж у другим року, уключел сом ше до фодбалскей екипи на факултету и ходзели зме на змаганя по цалей Югославиї. Здогадуєм ше же зме були на финалним змаганю у Сараєве, дзе зме бавели процив домашнєй студентскей екипи и судия нє пискал конєц змаганя док вони нє победзели, так же зме ту освоєли друге место. – гвари Загорянски.

Под час студентских дньох Юлиян бавел у новосадским фодбалским клубу „Раднички” дас рок, а вец прешол до вербаского клубу „Радник” и помали  ше врацал до Коцура, бо окрем фодбалу требало думац и о конкретней роботи.

35 Zoz Agronomijadi u Sarajeve copy

– У новосадским клубу сом ше нє затримал длуго, бо ме волали же бим прешол до вербаского клубу „Радник” дзе бул познати тренер Симо Милованов и прешол сом там бавиц фодбал и наисце ми одвитовало. Медзитим, у Коцуре ше у тим чаше, 1966. року почала правиц добра фодбалска екипа у Искри и мнє ше попачела идея же бим конєчно бавел фодбал за Искру, бо сом ше по студийох врацел жиц до Коцура. Тренер бул Кирил Киш, барз ше трудзел коло нас и добри фодбал зме бавели, алє нам ше нє удало войсц, до теди, новосадскей лиґи – гвари Загорянски.

Окрем фодбалу, як гобия, Юлиян як инженєр аґрономиї уж требал глєдац даяку роботу и конкуровал до коцурскей Задруґи.

– Роботу нїґда нє було лєгко достац, та и у моїм случаю було так – якош нїяк достац место у Задруґи. Но,  волали ме робиц до Руского Керестура, алє под условийом же будзем бавиц фодбал за Керестур, та сом пошол на пробне змаганє процив Оджаку. Кед то чули у коцурскей Задруґи, же сом у прегваркох зоз Керестуром, ютредзень ми дали роботу у Задруґи дзе сом робел до пендзиї – гвари Юлиян.

 У коцурскей Искри Юлиян активно остал бавиц до 1975. року, потим бул у управи клуба, предсидатель, секретар и помоцни тренер у Искри, алє нїґда нє одбавел свойо „одпитуюце змаганє”.

– Кед так спатрим свою спортску кариєру, наисце ми жаль же сом нє одбавел тото „одпитуюце змаганє” у Искри, алє и же сом нє пошол голєм пробовац забавиц за Партизан. Нє мам представу як би то випатрало, алє, ниа, то ми остало як питанє на котре нє мам одвит – заключує Загорянски.

Юлиян ше и нєшка, у своїх пензионерских дньох поряднє провадзи фодбалски змаганя на шицких уровньох, а понеже жиє нєдалєко од стадиона, ходзи и на Искрово змаганя и там ше стрета зоз своїма старима приятелями котрим фодбал занавше остал велька любов.

РЕЗУЛТАТИ И ТРУД ШЕ ВИПЛАЦЕЛИ

Фодбал ше дараз давно нє бавело на таким професийним уровню як нєшка и фодбалере нє мали порядну плацу. Медзитим, лєпши клуби своїм фодбалером виплацовали премиї. Юлиян у стреднєй школи у Зомборе, док три роки бавел за ФК „Жак” доставал премию од каждей побиди, и гвари же тоти премиї були векши як познєйше його плаца у Задруґи.

БРАЗИЛСКИ ТАЛАНТ

Назвиско Ґаринча (птичка, на портуґалским), Юлиян достал ище у 8. класи, по назвиску Мануела Франциска дос Сантоса, члена бразилскей фодбалскей репрезентациї  хтора освоєла Шветово першенства 1958. и 1962. року. Юлиян бул швидки и мал подобни рухи як и Ґаринча, та го прето так и товарише зоз фодбалу наволали.

– Длуго, роками ме волали так, голєм док сом бул у швеце фодбалу. А тераз уж лєм стари товарише хасную тото назвиско – гвари коцурски Ґаринча.

ПОВЯЗАНИ ТЕКСТИ