ЗЕМУН – У римокатолїцкей парохиї у Земунє 26. априла отримана едукация за священїкох у рамикох проєкту „Розвой Каритасу – зменшанє худобства”.
На едукациї участвовали коло двацец священїки зоз Сербиї и штирме грекокатолїцки паноцове зоз Керестура, Кули и Сримскей Митровици.
Присутних привитал предсидатель Каритасу Сербиї Станислав Хочевар, надвладика и митрополит беоґрадски, котри наглашел же худобство нє вше лєм материялней природи, алє найчастейше духовней.
Як спомнуте, а тим поволана цала Церква же би постала права заєднїца дзе шицки одвичательни єдни за других, алє и за своїх ближнїх, о чим бешедую документи Другого Ватиканского Собору.
Преподаванє на спомнуту тему отримали представнїки Каритасу Горватскей, Сузана Борко, заменїк директора Каритасу Горватскей и дипломовани теолоґ Роберт Футач, водитель Служби за парохиялни Каритаси у заґребскей надбискупиї.
Як наглашела панї Борко, кажда парохия поволана шведочиц каритас або конкретне шведоченє Божей любови ґу чловекови. Же би так було, кажди владика прейґ священїкох поволани формовац парохиялни заєднїци як отворени доми за каждого котри ма було яку потребу.
Проф. Роберт винєсол числени приклади добрей пракси у заґребских парохийох, алє и у малих заєднїцох у околїску Заґреба.