Час за консолидованє аґрара

автор мгк, фото вев
1.4k Опатрене

НОВИ САД – Вчера шветочно отворени 85. Медзинарони польопривредни саям у Новим Садзе, на котри пришли велї представнїки републичного, покраїнского и локалного уровня власци, вельочислени привреднїки зоз жеми и иножемства и нащивителє, а Саям отворел министер польопривреди и защити животного штредку Бранислав Недимович.

– После финансийней консолидациї у держави, пришол час за зредзованє стану у аґрару и же би польопривреднїки достали вецей средства. Окреме дзекуєме Влади Французкей же нам помага у розвою. Сцеме же би тот Саям ище баржей роснул. Мушиме зачувац сербску польопривреду и за собу охабиц лєпшу Сербию як цо зме ю нашли и як цо є тераз – гварел министер Недимович.

Окрем нього, на отвераню бешедовали и представнїки Новосадского сайма, Городу Нови Сад, АП Войводини, Зєдинєних Арабских Емиратох и Французкей.

На Польопривредним сайме єст скоро 1 500 викладательох зоз 60 державох, а першираз участвує и держава зоз Африцкого континента – Тунис, хтора будзе мац Националну виставу.

На Сайме ше видвоюю национална вистава статку, вистава орґанскей поживи и продуктох з ознаку ґеопоходзеня, вельке число дїловних случованьох у Конґресним центру, наградне бависко за нащивительох и традицийна вистава польопривредней механїзациї.

Министерство польопривреди, лєсарства и водопривреди финансує и орґанизує виставу „Квалитет вецей” у Гали 6, дзе виложени и орґански продукти и продукти зоз ознаку ґеоґрафского походзеня.

Покраїнска влада прейґ ресорних секретариятох ма заєднїцки наступ зоз покраїнскима институциями, же би на єдним месце презентовали заєднїцки инвестициї у цилю потримовки и унапредзованя войводянскей польопривреди. Так першираз предвидзена и вистава „Войводина ґастрореґион”, на хторей участвую 30 мали продукователє напою и єдла зоз АП Войводини, а хтори хасновали субвенциї секретарияту.

Того року єст вельо вецей фирми зоз Турскей, Италиї, Голандиї и Румуниї, а представяю ше и компаниї зоз Русиї, Тунису, Велькей Британиї и Луксембурґу, хтори влонї нє були на Сайме.

Вистава польопривредней механїзациї твори трецину отвореного простору за викладанє. Шицко цо виложене на найпознатших саймох, виложене и у Новим Садзе. Капацитети за вистави пополнєти ище скорей як цо то було влонї.

Нащивительом интересантни вигодни цени, хтори одобрую члени Дїловного здруженя, як и финансийни институциї. Тоти попусти од 3 до 10 одсто. У рамикох Вистави статкарства и того року будзе отримане аукцийне предаванє найквалитетнєйшого статку. Окрем рогатого статку, пред купцами и конї, швинї, овци и кози.

У наградним бависку нащивителє зоз купенима уходнїцами того року можу достац два трактори и ротофрезу. Слово о тракторох „беларус 622” и „джон дир 5045 д” и ротофрези „хисарлар”, а дародавателє „Аґропанонка” и „КИТЕ” ДОО.

Будзе отримани и ярнї фестивал вина, 18. и 19. мая, на хторим коло сто викладаче буду промововац найквалитетнєйши вина и палєнки зоз тих просторох.

Уходнїци за Польопривредни саям коштаю 600 динари, а роботни час од 9 до 19 годзин. За гевтих хтори приду у рамикох колективних нащивох, у ґрупох векши як 15 особи, цена 400 динари. Школяре и студенти, тиж у орґанизованих нащивох плаца 200 динари, кельо кошта и уходнїца за пензионерох и дзеци од 7 до 12 рокох.

Фамелийни дзень на пияток, 18. мая. Того дня цала фамелия, зоз дзецми до 16 рокох, може нащивиц Саям з єдну уходнїцу за 600 динари.

 

ПОВЯЗАНИ ТЕКСТИ