Нова фаза миґрантскей кризи на подручу шидскей општини прави и нови спокуси. Нєшка ше миґранти затримую длужей, понеже слово о популациї хтору Уния нє прилапює. То причина за евентуални проблеми у обласци безпечносци, та ше локална самоуправа намага дїйствовац превентивно.
После полрочного периоду кед Шид бул транзитне подруче дзе миґранти, теди найвецей зоз Сириї, чекали найдлужей 24 годзини же би прешли гранїцу и пошли до ЕУ, нєшка кед гранїци ЕУ заварти, миґранти ше длужей затримую у трох дочасових прилапних центрох
Коло тисяч миґрантох, тераз углавним зоз Пакистану и Авґанистану змесцени до прилапних центрох у дакедишнїм мото-готелу на авто драги при Адашевцох потим на ,,Принциповцу” на гранїци зоз Републику Горватску, а тиж и у прилапним центре просто гайзибанскей станїци у присподобеним будинку дакедишнєй шидскей месней индустриї ,,Срим”. Праве тот прилапни центер у самим городзе мал вельке значенє кед ше миґрантох єден час на гайзибанох орґанизовано кажди дзень превожело до Републики Горватскей. После завераня такволаней ,,балканскей рути” наступел зацих, а вец ознова почали сциговац миґранти, алє тераз зоз державох зоз хторих их держави ЕУ нє сцу прияц.
ДИЛЕМИ КОЛО АЗИЛУ
Кельо ше вони затримаю на тим просторе, конкретни одвит затераз нєт. У Шидзе зме нє достали информацию же чи єст одредзени период у хторим ше вони муша вияшнїц чи буду глєдац азил чи нє, а кед го глєдаю, чи останю на тим подручу лєбо пойду до порядних азилантских центрох дзе ше чека ришованє вимоги.
Можу питац азил у Сербиї, алє вец практично одуставаю од намири же би предлужели драгу далєй, до жемох Униї. Медзитим, понеже ЕУ нє прима вибеженцох хтори нє можу доказац же приходза зоз воєно загрожених подручох, односно хторих третирує як економских миґрантох. У таких обставинох рошнє нєизвесносц, та и нервоза при миґрантскей популациї. Живот нє чека, та так и миґрантох змесцених у центру на гайзибанскей станїци, медзи хторима доминую млади особи и хлопи-леґинє, каждодньово мож видзиц у Шидзе на улїцох лєбо на пияцу. Як зме уж писали, од половки септембра прешлого року потераз, през шидску општину прешло вецей як 700.000 миґрантох. У тей маси було случаї же поєдинци потупели норми прикладного справованя и нє притримовали ше законских предписаньох, а нєдавно призначени и каребни дїла у хторих участвовали миґранти. Алє на щесце слово о символичним чишлє особох. Же би ше благочасово реаґовало, Општински Совит за безпечносц розпатрал стан безпечносци з акцентом на миґрантску кризу, а централне становиско же безпечносц муши буц на уровню и за домашнїх жительох и за миґрантох, односно же шицки длужни почитовац закони и предписаня, чи то домашнї державянє, чи странски, у тим случаю миґранти.
Векше присуство полициї, як и контрола уходу и виходу зоз прилапного центра, окреме од 22 по шейсц годзин рано, лєм даєдни з мирох хтори допоможу же би безпечносц була зачувана на високим уровню. Як єдна з остатнїх мирох, у случаю же безпечносц будзе загрожена, локални власци можу од висших инстанцох вимагац заверанє прилапного центру на гайзибанскей станїци, алє затераз то нє опция.
ПОТРЕБНА И ПСИХОЛОҐИЙНА ПОТРИМОВКА
Домашнє жительство добре прияло миґрантох и на тей релациї потераз нє було проблема. Миґранти у остатнї час приходза и на пияц предавац конзервовану поживу, лакотки и инше цо им звишок, а тарґовци на пияцу им аж помагаю же би ше лєгчейше знашли з нашим пенєжом цо и як наплациц. Здогаднїме, на нєдавним турниру у малим фодбалє у Адашевцох бавела и екипа хтору составели миґранти, цо би тиж могол буц єден з позитивних прикладох як тим людзом олєгчац пребуванє на тим просторе и як их анимировац же би прикладно препровадзели час.
Вжиме даскельо мешаци з потримовку УНИЦЕФ-а робела и психолоґийна служба при Центру за социялну роботу хтора була задлужена же би ше старала о дзецох миґрантох и помагала превозисц або ублагац стрес пре шицко цо дожили. Чи би и тераз, кед миґранти оставаю длужей на тим просторе могла буц запровадзена подобна психолиґийна помоц и за одроснутих? У Червеним крижу у Шидзе гваря же и тота можлївосц иснує и же ю мож витвориц з помоцу републичного Червеного крижу и Комесарияту за вибеженцох и миґрациї. Таке дацо вшелїяк будзе потребне у наиходзацим периодзе хтори швидко придзе, кед почнє єшень и нєвигодна хвиля, та миґранти буду примушени вецей часу препровадзиц у завартим просторе у прилапним центре. Як нам нагаднуте, компетентни у локалней самоуправи и надалєй буду провадзиц стан безпечносци у општини, и зависно од околносцох, и предкладац, и запровадзовац потребни мири.
