БЕОҐРАД – Влада Сербиї по конєц октобра планує прилапиц нову уредбу о безплатней струї, ґазу и зогриваню за загрожених, з хтору буду превозидзени нєправилносци пре хтори терашня уредба преглашена як нєуставна.
– Ключне же бизме цо скорей прилапели нову уредбу и почали ю применьовац уж у новембру, а правна система да одвит цо маме робиц у периодзе покля нє будзе прилапена – гварел министер енерґетики Александар Антич и додал же ше випитує можлївосц применьованя такого ришеня и пред його службеним прилапйованьом.
Тераз ше роби на утвердзованю конкретних ришеньох, а министер Антич гварел же ше вироятнє прешири круг потенциялних хасновательох тей помоци. Тиж виявел же на ришованю проблему робя министерства у сотруднїцтве зоз Шветову банку, понеже вона ма искуства у тей обласци.