Будзе основана ВАНУК

автор сен
836 Опатрене

НОВИ САД – Найзначнєйши точки на вчерайшей схадзки Скупштини Автономней покраїни Войводини були прилапйованє ребаланса буджету за 2015. рок и розправа о снованю длуго наявйованей Войводянскей академиї наукох, уметносцох и култури (ВАНУК).

Зоз 67 гласами покраїнских посланїкох прилапени ребаланс буджету, та того року АП Войводина ма на розполаганю 63, 9 милиярди динари, цо за 1,36 милиярди вецей як цо плановане. Предсидатель Покраїнскей влади Боян Пайтич гварел же би буджет бул вельо векши кед би ше почитовало обовязки спрам Покраїни хтори дефиновани з Уставом Републики Сербиї, а наглашел же державна администрация длужна Покраїни коло 40 милиярди динари.

Пенєж обезпечени з ребалансом насампредз будзе уложени до розвойних програмох у польопривреди, образованю и здравстве, та до запровадзованя конкурсу за купованє хижох на валалє за млади малженски пари, гварел Пайтич.

Процив прилапйованя ребалансу покраїнского буджету були странки опозициї – СНС критиковала же прешлого року було барз мало капитални инвестициї, та же нє витворени рост дружтвеного бруто домашнього продукту и занятосци. Посланїки з Руху социялистох ше тиж поволали на прешлорочни нєдостаточни капитални укладаня и виражели подозривосц же пенєжи законча у кишенкох функционерох Демократскей странки (ДС).

На вчерайшей схадзки Скупштини АПВ принєшена Скупштинска одлука о снованю Войводянскей академиї наукох, уметносцох и култури (ВАНУК), явней установи хтора будзе зазберовац и виучовац материяли з обласци науки, уметносци и култури Войводини, занїмац ше з видавательну дїялносцу и сотрудзовац зоз зроднима установами у Сербиї и иножемстве.

У розправи о Нарису скупштинскей одлуки о снованю ВАНУК посланїки ДС винєсли идею о ВАНУК як институциї хтора представя институцийни вираз того по чим Войводина ориґинална и специфична, так же ВАНУК потребна, а и у тей точки дньового шору опозиция завжала оштре становиско.

Посланїки Руху социялистох гварели же снованє ВАНУК нє уставне, та же ше през єй формованє пробує фомовац войводянску нацию, а СНС виражели прешвеченє же снованє тей установи то политични проєкт Покраїнскей влади, хтори у процивносци з Уставом Сербиї. Кед будзе принєшена одлука о снованю ВАНУК, вона будзе предмет розправи Уставного суду, гварели посланїки СНС.

ПОВЯЗАНИ ТЕКСТИ