ВЕРБАС – Нєшка у сали Скупштини општини Вербас порушани поступок за снованє Локалней акцийней ґрупи за рурални розвой (ЛАҐ). Проєкт порушали Оддзелєнє за польопривреду Општини Вербас и Реґионална розвойна аґенция Бачка.
Як визначел помоцнїк предсидателя Општини Милан Милич, Вербас єдна з локалних самоуправох хтора ма найвецей условия за конкурованє за проєкти ИПАРД програми, а формованє ЛАҐ-у помогнє лєгчейшому доходзеню до средствох з фондох Европскей униї.
Координаторка проєкту „Локални инициятиви за рурални розвой Бачкей” Ивана Паїч з Европского центру Нови Сад визначела же циль Ґрупи будзе виробок Локалней стратеґиї руралного розвою и упознаванє приватного, явного и цивилного сектору з можлївосцами финансованя дїловних активносцох з хаснованьом ИПАРД програми за Сербию.
