НОВИ САД – У Новим Садзе, у Мадярским културним центре Петефи Шандор, на соботу 10. октобра, будзе отримана XII медзинародна наукова конференция Интеркултуралносц у образованю – ИНТЕРКУЛТ 2026.
Конференцию орґанизую Педаґоґийни завод Войводини, оддзелєня за гунґаролоґию, румунистику, русинистику и словакистику Филозофского факултетa Универзитета у Новом Саду и Учительски факултет на мадярским наставним язику у Суботици.
Як и прешлих рокох, циль Конференциї представянє резултатох виглєдованьох и промовованє интеркултуралносци, витворйованє мрежи домашнїх и фаховцох з иножемства з обласци интеркултуралносци у образованю, як и черанка искуствох у практичним применьованю интеркултуралних компетенцийох шицких актерох образованя.
Главна тема конференциї ‒ Интеркултуралносц у образованю ма свойо подтеми:
– Интеркултуралносц и настава,
– Интеркултуралносц и язик,
– Интеркултуралносц и литература,
– Интеркултуралносц и история,
– Интеркултуралносц и прекладанє,
– Интеркултуралносц и уплїв медийох.
У пленарних преподаваньох того року будзе участвовац науковец зоз Универзитету у Ґрацу Марко Симонович зоз тему Утвердзени способи лексичного збогацованя як ключни ресурс за виталносц язика: приклад панонского руского.
На конференциї свойо виглєдованя буду викладац и науковци зоз рускей заєднїци, а медзи нїма и Дюра Гарди и Саша Сабадош хтори презентую нови виглєдованя у вязи зоз подобу Петра Кузмяка. Александер Мудри и Анита Ґовля представя концепт Кирбаю у интеркултуралних контактох Руснацох, а Ана Римар Симунович и Александра Деянович укажу яки елементи интеркултуралносци у Руских новинох.