РУСКИ КЕРЕСТУР – Пре мали вибор за виход и розвагу у валалє, млади ше муша знаходзиц, та прето на дакус нєзвичайним месце, у ґаражи Добродзечного огньогасного дружтва, того викенду отримана „Керестур опен” журка.
Пияток, 2. октобра, бул вечар резервовани за познати гити 90-их рокох, хтори ше пущало зоз рахункара, а собота, 3. октобер, бул резервовани за наступи андерґраунд бендох.
Перши наступели „Домски идиоти”, млади панк состав зоз Суботици, хтори творя троме штредньошколски хлапци и хтори зоз репертоаром обробених познатих панк гитох бендох як цо то наприклад Атеист реп и КУД Идиоти добре зограли публику.
После нїх наступел кус познатши, алє и далєй андерґраунд, новосадски панк-рок кавер бенд „Шамар толеранциї”, хтори познати по сировей енерґиї и твардим звуку.
Як визначели орґанизаторе шестра и брат Сабина и Себастиян Планчак, и Синиша Сивч, циль такого случованя бул же би млади мали дзе висц, дружиц ше и послухац алтернативну файту музики.
Окрем розваги, журка мала и гуманитарни характер, понеже ше збералo добродзечну помоц за Луку Лацко зоз Кули, а з тей нагоди назберане коло 36 тисячи динари.
