Лидия Фодор зоз Бачкей Тополї ше прешлого року уписала на треци рок докторских студийох информатики, на Природно-математичним факултету у Новим Садзе, дзе роби як асистентка.
Понеже математику люби одмалючка, по законченей штреднєй школи, Лидия ше уписала праве на Природно-математични факултет у Новим Садзе.
– Длуго сом нє знала за хтори напрям ше опредзелїц, бо ме прицаговала и математика и информатика. Програмованє ме почало вше баржей цикавиц, та сом на концу вибрала студиї информатики. Нїґда сом нє побановала пре вибор студийох. Програма на тим напряме наисце интересантна и креативна, нїґда нє було допито – гвари Лидия.
Гоч закончела ґимназию общого напряму и нє мала таку моцну основу як дзепоєдни єй колеґове хтори закончели фахово штреднї школи, Фодорова нїґда нє одступала од планох, та швидко здогонєла колеґох.
– Початок нє бул лєгки, алє сом була дисциплинована, поряднє сом ходзела на шицки преподаваня и вежби, поряднє учела и покладала испити. То було цалком досц, нє требали ми дополнююци годзини, гоч сом рушела од „нули” – толкує вона.
Лидия була винїмкови студент, а пред тим як закончела мастер студиї, понукнута єй робота на факултету. Перше була виглєдовач сотруднїк, а од фебруара прешлого року є асистентка на Катедри за информацийни технолоґиї и системи на ПМФ-у. Трима вежби студентом основних и мастер студийох.
– На початку ми було покус чудне. Дакеди сом шедзела у тих лавкох, а вец сом нараз була у улоги асистента. Вецей нє мам трему, любим тоту роботу, наисце є красна – студенти заинтересовани, слухаю, лєгко з нїма робиц, вредзи им помагац. Видзим смисел роботи – гвари Фодорова.
Окрем роботи на факултету, Лидия роби и у Ґимназиї „Йован Йованович Змай” у Нови Сад, дзе преподава програмованє и програмски язики. Нє ма вельо шлєбодного часу, алє нє занєдзбала гобиї. Поряднє ходзи до теретани, а люби и читац.
– Читам скоро шицки жанри. Любим психолоґию, мистику, трилери, класични романи. Окреме ше ми пачи французки писатель Ґийом Мусо, препоручуєм шицким най пречитаю даєдно його дїло. Найчастейше читам у автобусу, бо кажди дзень путуєм зоз Тополї до Нового Саду на роботу. Читанє ме опущує. Уживам, а квалитетно препровадзим час – додава Лидия.
Найбаржей ю потримовали родичи и леґинь, хтори, як гвари, мали вельо порозуменя и були сцерпезлїви. Найважнєйше єй цо скорей закончиц докторски студиї, за хтори практичну часц роботи пририхтує на тему „Паралелне програмованє и домен: специфични язики”. У тиму зоз другима програмерами, у сотруднїцтве зоз EPFL факултетом у Швайцарскей, роби на проєкту за злєпшованє програмских язикох, конкретно язика „R”, хтори служи за статистику и обрабянє податкох.
– Совитуєм шицким хтори ориєнтовани на природни науки и маю аналитични способ роздумованя же би ше опредзелєли за информатику. Медзитим, нє муши ше буц окремни, нє треба нїч винїмкове, лєм мац тварду дзеку. Треба поряднє окончовац свойо обовязки и вец мож посцигнуц шицко – прешвечує Лидия Фодор.
[/vc_column_text] [box type=”coloured” pb_margin_bottom=”no” width=”1/1″ el_position=”first last”]
Мено и презвиско: Лидия Фодор
Датум народзеня и место одрастаня: 25. юлий 1989. року, Бачка Тополя
Основна школа: Основна школа „Чаки Лайош”, Бачка Тополя
Штредня школа: Ґимназия „Доситей Обрадович”, Бачка Тополя
Основни и мастер студиї: Универзитет у Новим Садзе, Природно-математични факултет, Департман за математику и информатику, напрям – информацийни технолоґиї. Дипломовала 2011, мастеровала 2013. року
Докторски студиї: Универзитет у Новим Садзе, Природно-математични факултет, Департман за математику и информатику, модул: информатика, на хтори ше уписала 2013. року
Награди и стипендиї: Награда Природно-математичного факултета и новосадского универзитета за закончени основни студиї, Награда за закончени мастер студиї информатики „Александар Саша Попович”, стипендия Фонда за млади таланти, стипендия Министерства просвити, науки и технолоґийного розвою
Науково конференциї: Медзинародна конференция информатики BCI (Balkan Conference on Informatics) у Новим Садзе, 2012. року, Медзинародна конференция информацийних технолоґийох ICIST 2015 (International Conference on Information Society and Techology) на Копаонику, у марцу 2015. року
Роботне место: Асистентка на Катедри за информацийни технолоґиї и системи, Департман за математику и информатику, Природно-математични факултeт, Нови Сад. Професорка у Ґимназиї „Йован Йованович Змай”, Нови Сад
[/box]