КОЦУР/РУСКИ КЕРЕСТУР – Делеґация скаутох з Ужгороду, з України, вчера до Коцура и Руского Керестура принєсла Вифлеємски огень, хтори рушел з Вифлеєму и на драги по Сербию уж обишол вецей европски жеми и рознєшени є на шицки боки швета.
У Коцуре огень скаутох з огньом привитали шестри служебнїци и кулски парох о. Виталий Лотоцки, а пренєшени є до каплїчки коцурского манастиру, одкаль го можу превжац шицки парохиянє.
Вифлеємски огень и троїх скаутох з Ужгороду у Руским Керестуре у Катедралней церкви прияли парох о. Михайло Малацко и капелан Михайло Шанта, котри з Вифлеємского огня запалєл вельку швичку и поставел ю у церкви. По Служби присутни вирни з огня запалєли свойо швички и однєсли их до своїх домох.
Швичка запалєна з вифлеємским огньом будзе стац у церкви през шицки днї Крачуна и вирни з нєй можу вжац пламень на свойо швички и однєсц го до своїх обисцох.
Скаути Вифлеємски огень преноша з мотом „Мир у каждим обисцу”, а после Коцура и Руского Керестура, огень будзе однєшени до Будапешту у Мадярскей и до Прешова у Словацкей.
