НОВИ САД – Вчера, на трецим зашеданю Скупштини Автономней покраїни Войводини (АПВ) у новим зволаню вибрана нова Покраїнска Влада, на чолє з предсидательом Иґором Мировичом (СНС) и подпредсидателями Дьордьом Миличевичом, Иваном Дьоковичом (СПС) и Михальом Нїлашом (СВМ).
Нєшка дополадня будзе примо-придаванє длужносци предсидателя Покраїнскей влади медзи Бояном Пайтичом и Иґором Мировичом. После 16 рокох власци Демократскей странки и єй партнерох у Покраїнскей влади, на чоло приходза кадри СНС и єй коалицийних партнерох – Руху социялистох (РС) и Социялдемократскей партиї Сербиї (СДПС), а нову Владу творя и члени СВМ и СПС. Сербскей напредней странки у новей Покраїнскей влади припадли осем ресори, а по єден СПС, СВМ, РС и СДПС.
Покраїнска влада будзе мац 12 секретарияти, єден вецей як скорейша. На чолє Покраїнского секретарияту за привреду и туризем Иван Дьокович (СПС), ресор польопривреди, водопривреди и лєсарства будзе водзиц Вук Радоєвич (СНС), а Ненад Ґрбич (СДПС) нови покраїнски секретар за енерґетику, будовательство и транспорт. На чолє Покраїнского секретарияту за урбанизем и защиту животного штредку Владимир Ґалич (СНС), а Оґнєн Бєлич (СНС) будзе секретар за реґионални розвой, медзиреґионалне сотруднїцтво и локалну самоуправу.
За обласц култури, явне информованє и одношенє з вирскима заєднїцами задлужени Мирослав Штаткич (СНС), а на чолє Секретарияту за социялну политику, демоґрафию и ровноправносц полох Предраґ Вулетич (ПС). Нови Покраїнски секретар за здравство доц.др Зоран Ґойкович (СНС), за спорт и младеж Владимир Батез (СНС), а за високе образованє и наукововиглєдовацку дїялносц проф.др Зоран Милошевич (СНС).
Єдина жена на чолє даєдного секретарияту то Смилька Йованович (СНС), котра будзе водзиц Покраїнски секретарият за финансиї, а єдини нови-стари покраїнски секретар Михаль Нїлаш (СВМ), котри и у нововибраней Покраїнскей влади на чолє Секретарияту за образованє, предписаня, управу и национални меншини-национални заєднїци.
За нови состав Покраїнскей влади гласал 81 покраїнски посланїк, а по пришаги членох Влади у Скупштини АПВ, Мирович посланїком представел програму Покраїнскей влади и гварел же главни циль нового составу будзе прицагованє наших и иножемних инвеститорох пре порушованє найслабше розвитих општинох у Войводини.
Нова Покраїнска влада будзе робиц на цо швидшим прилапйованю Закона о финансованю и одвичательносцох АПВ, цо уж длуго єден з ключних проблемох Покраїни, а ифраструктура тиж будзе єден з приоритетох у будуцей штиророчней програми, гварел Мирович.
Медзи иншим, вон наявел и вибудов нового будинку РТВ Войводини, докончованє капиталних проєктох, як цо то гайзибанска драга Беоґрад-Будапешт, Жежельов мост, Народнио театер у Суботици, а будзе вибудована и заобиходна драга коло Нового Саду.
Як пренєсол „Блиц”, вчера дополадня пред схадзку Скупштини Иґор Мирович гварел же нова Покраїнска влада будзе инсистовац и на интензивованю сотруднїцтва з националнима заєднїцами и їх совитами.
– Жадаме злєпшац стан у обласци їх образовних и културних дїялносцох и жадаме участвовац у финансованю шицких їх активносцох и проєктох – наглашел тераз уж предсидатель Покраїнскей влади Иґор Мирович.