ЦЕЛЄ (СЛОВЕНИЯ) – На Медзинародним сайме ремеселнїцтва и поднїмательства „МОС 2016“ у словенским Целю прешлого тижня наступели и представителє войводянскей привреди, на чолє з Покраїнским секретариятом за привреду и туризем.
Свою дїялносц и продукти представели Туристична орґанизация Войводини, односно єй програма „Богатство розличносцох“ и 25 привредни субєкти з АП Войводини.
„Днї Воводини” на Сайме отворел покраїнски секретар за привреду и туризем Иван Дьокович, у рамикох простору за викладанє Секретарияту, а на отвераню присуствовали представителє Министерства привредного розвою и технолоґиї Републики Словениї, реґионалних привредних коморох, руководителє Сайму и викладателє. Дьокович и сотруднїки, медзи нїма и його помоцнїк Серґей Тамаш, з директором цельского сайму Робертом Оторепецом и ресорним министром Здравком Почивалшеком бешедовали о можлївосцох преглїбйованя привредного сотруднїцтва.
Компания ,,ArborSpalet“ з Бачкей Паланки, хтора продукує древену амбалажу, на Сайме подписала контракт вредни 876 000 еври, з компанию за тарґовину на велько и поштредованє,,Arbon“ з Целя.