КОЦУР/РУСКИ КЕРЕСТУР – Еколоґийни рух „Желєни персцень” з Руского Керестура, у сотруднїцтве зоз Школу „Петро Кузмяк”, у спортско-школскей гали нєшка на 13 годзин орґанизує еколоґийну програму, на хторей школяре першей класи основней школи достаню младнїки ореху, дарунок др Юлияна Рамача з Коцура, а школяре другей класи пауловниї, хтори обезпечел Еколоґийни рух.
Праве вчера у Коцуре, у обисцу проф. Юлияна Рамача, школяре керестурскей Школи, з наставнїком физичного воспитаня Славком Папом, викопали младнїки хтори нєшка буду подзелєни школяром у Керестуре.
Тиж так, проф. др Рамач вчера подаровал и младнїки хтори викопали коцурски огньогасци и проф. др. Михайло Фейса, предсидатель Одбору за сотруднїцтво з нєвладовима орґанизациями коцурскей Месней заєднїци (МЗ). З нїма ожелєнєни часци Коцура, теметова, парохиї, а заинтересовани Коцурци могли вжац саднїци за свойо обисца.
Инициятор акциї, орґанизованей з нагоди Дня планети жеми, бул спомнути Одбор МЗ Коцур и Еколоґийни рух „Желєни персцень” з Руского Керестура, а у акциї участвовали школяре керестурскей Школи „Петро Кузмяк”, коцурски огньогасци и велї други гражданє.