БЕОҐРАД/АПОСТОЛСКИ ЕҐЗАРХАТ – У организациї надбискупа беоґрадского и Каритасу Сербиї, а под покровительством предсидателя Сербиї Томислава Николича, внєдзелю, 18. септембра, у католїцкей катедрали Блаженей Дївици Мариї у Беоґрадзе отримани гуманитарни концерт за настраданих у нєдавним трешеню жеми у Италиї. На концерту наступел Симфонийски оркестер и Хор Радио-телевизиї Сербиї.
Митрополит Хочевар з тей нагоди наглашел як треба победзиц индивидуализем зоз заєднїцтвом и музичну гармонию, а предсидатель Николич цитировал папу Франциска, котри гварел же „нє видзиц проблеми швета – то сучасни грих чловечества”. Николич визначел и вельку блїзкосц Италиї и Сербиї и, як гварел, тот ґест гуманосци треба похопиц и як звичайну доброту и приятельство двох народох.
На концу концерту, на хторим присуствовал дипломатски кор, представителє церковних гуманитарних здруженьох, представителє Православней церкви и Исламскей заєднїци, як и нашо грекокатолїки з Беоґраду, на чолє з беоґрадским деканом и парохом о. Владиславом Варгом, подзекованє предсидателя Италиї на тим гуманим чину присутним винєсол амбасадор Италиї у Београдзе Дюзепе Манцо.
На дзень концерту, внєдзелю, окрем молитви, у шицких грекокатолїцких и католїцких парохийох у Сербиї зберана и материялна помоц.
У 11 парохийох нашого Апостолского еґзархату Каритас за помоц настраданим у трешеню жеми у Италиї назберал скоро 133 000 динари.
