РУСКИ КЕРЕСТУР – Медзинародни Дзень планети Жеми вчера означени и у керестурским Оддзелєню „Цицибан” Предшколскей установи „Бамби” з Кули, а тиж и у Школи „Петро Кузмяк”.
У керестурскей дзецинскей заградки дзеци у шицких воспитних ґрупох зоз своїма виховательками бешедовали о значеню Дня планети, а потим у дворе витворели и свойо подобово креациї на тему чуваня планети и рециклажи.
У Основней и штреднєй Школи „Петро Кузмяк” Дзень планети Жеми означени и з єдну фазу у гуманитарней акциї „Зоз затичку ґу ошмиху”, до хторей керестурска Школа уключена од початку рока.
Школяром пиятей и шестей класи, членом Биолоґийней секциї, преподаванє отримали ґимназиялци руских оддзелєньох. Бешедовали о Дню планети и о еколоґийним и гуманим аспекту акциї збераня затичкох, з хтору ше прейґ Здруженя „Зоз затичку ґу ошмиху” з Нового Саду, помага набавяц ортопедску опрему дзецом з инвалидитетом.
Отримана и презентация з тему „Рециклажа повязана з математику”, а потим школяре Биолоґийней секциї и шицки оддзелєня нїзших класох, зоз своїма учителями, посортировали 10 вельки мехи зоз затичками, кельо дотераз назберали школяре и заняти.
Шицки активносци у Школи орґанизовали професорки биолоґиї и математики Єлена Шомодї, Евелин Блаґоєвич и Наталия Будински, котра и иницировала акцию збераня затичкох.
