РУСКИ КЕРЕСТУР – Националне швето Руснацох – 17. януар – вчера означени у двох керестурских образовних установох – у Основней и штреднєй школи зоз домом школярох „Петро Кузмяк” и у оддзелєню дзецинскей заградки „Цицибан” ПУ „Бамби”.
У шицких оддзелєньох Основней и у Штреднєй Школи Швету була пошвецена перша годзина, кед пречитани пригодни текст о Руснацох на тих просторох, у школским голу пририхтана пригодна вистава дзецинских подобових роботох, а школяре IV класи з учительку Наталию Зазуляк нащивели шедзиско нашого Националного совиту. О Руснацох у Сербиї им там бешедовала секретарка Совиту Таня Арва Планчак.
Застави рускей националней меншини у Сербиї у Руским Керестуре стаємно виложени на културних и образовних установох и шедзиску Националного совиту, а нє лєм з нагоди Националного швета.
