ШИД – Пейц опозицийни странки у шидскей општини – Социялдемократска странка (СДС), Демократска странка (ДС), Лиґа социялдемократох Войводини (ЛСВ), Либерално-демократска партия (ЛДП) и Вєдно за Сербию (ВЗС) ше штварток, 4. децембра, порадзели о сотруднїцтве и дїлованю, як поведзене у сообщеню – на хасен гражданох општини.
Схадзка општинских одборох чолнїкох 5 странкох отримана у шедзиску СДС, на хторей, як ше наводзи у сообщеню, розпатрени чежки стан у општини, порадзене о конкретних активносцох о сотруднїцтве и превозиходзеню дотерашнїх медзисобних нєпорозуменьох. Заєднїцке дїлованє будзе у охрани интересох гражданох, а процив владаюцей коалициї Сербскей напредней странки, Демократскей странки Сербиї, Социялистичней партиї Сербиї-Партиї зєдинєних пензионерох-Єдинственей Сербиї и Сербскей радикалней странки-Желєнєй еколоґийней партиї.
– Чкоду хтору локална власц виволала гражданом општини Шид годна виправиц лєм моцна, шмела и зєдинєна опозиция, хтору творя шицки гевти котри зоз своїм искуством и роботу у периодзе пред приходом на власц терашнєй политичней ґарнитури, доказали же ше шидска општина може розвивац у добрим напряме и же гражданє знова маю право на достиїнствени живот – наводзи ше у сообщеню пейц странкох.