НОВИ САД – У рамикох Шветового дня лєсох, 21. марца ЯКП „Городске желєнїдло” и Польопривредни факултет означели 45 роки од снованя напряма Гортикултура и пейзажна архитектура на Польопривредним факултету и з тей нагоди отримани медзинародни фахово-совитодавни сход „Иновациї у гортикултури и пейзажней архитектури”.
Сход, хтори отримани у новим будинку ЯКП „Городске желєнїдло”, отворел покраїнски секретар за польопривреду, водопривреду и лєсарство др Вук Радоєвич. Вон Польопривредному факултету повинчовал ювилей и здогаднул же Покраїнски секретарият за польопривреду през Буджетни фонд уложел 600 милиони до унапредзеня лєсарства.
На тот способ зоз младима древками засадзени 275 гектари на териториї АП Войводини. Тераз у Войводини под лєсами єст 145 000 гектари, або менєй як 7 одсто поверхносцох, так же Секретарият и далєй будзе стимуловац локални самоуправи и явни подприємства же би садзели млади древка и звекшовали поверхносци под лєсами, гварел Радоєвич.
У рамикох означованя Медзинародного дня лєсох секретар Радоєвич, шеф Катедри за гортикултуру и пейзажну архитектуру проф. др Саша Орлович и директор ЯКП „Городске желєнїдло” Милош Еґич, зоз представнїками Института за лєсарство и защиту животного штредку учствовали у акциї садзеня младих древкох чарней тополї у лєшику при населєню Шанґай у Новим Садзе.
