РУСКИ КЕРЕСТУР – Лиґа социялдемократох Войводини (ЛСВ) всоботу, 24. октобра, на пияцу у Руским Керестуре и ище дзевец войводянских местох отримала акцию збераня подписох процив вименкох Закона о польопривредней жеми. Вименки, медзи иншим, предвидзую же од 1. септембра 2017. року странци годни без компликованих процедурох куповац жем у Войводини.
– Други проблем то же тайкуном будзе дате ексклузивне право же би тиж од 2017. року 30 одсто державней жеми брали под аренду на 30 роки, а з дошлєбодзеньом Министерства польопривреди. Значи же буду приходзиц людзе зоз Сербиї и брац под аренду жем у Керестуре, а ми о тим нє будземе нїч знац. Єдине цо нам остава у Войводини то тото природне богатство з хторого векшина з нас жиє, а то жем. Думам же з вименками Закона о польопривредней жеми нашо парасти буду очкодовани, понеже приоритет буду мац гевти котри сцу купиц од 10 гектари, на вецей – гварела народна посланїца ЛСВ у Скупштини Сербиї Олена Папуґа.
Акция почала 18. октобра у Селенчи и Билей Церкви, а подписи дотераз зберани у велїх войвоянских местох. Циль назберац 100 000 подписи, кельо потребне же би ше розписало референдум, а як гвари Папуґова, одволанє досц добре, но людзох о тим треба ище баржей поинформовац.
Пред збераньом подписох, активисти Лиґи ше зоз заставами прешпацирали по пияцу и дзепоєдних улїцох у Керестуре.