РУСКИ КЕРЕСТУР – У Велькей сали Дома култури Руски Керестур вчера, 19. януара, отримана дванаста по шоре Централна преслава з нагоди Националного швета Руснацох у Сербиї.
Мишани хор Дома култури и Катедралней церкви св. оца Миколая под руководством Лидиї Пашо и у провадзеню Националного оркестру под руководством Мирона Сивча, отворел Шветочну академию зоз гимну Републики Сербиї, „Боже правди”, а потим виведли и шветочну шпиванку „Браца Русини”.
З привитнима словами присутним Швето винчовали предсидатель Националного совиту рускей националней меншини Борислав Сакач, владика кир Георгий Джуджар, амбасадор Українскей амбасади у Сербиї Олександер Александрович, предсидатель Дочасового орґану Општини Кула Велибор Милоїчич и покраїнски секретар за културу, явне информованє и одношеня з вирскима заєднїцами Драґана Милошевич.
После пригодних бешедох Мишани хор Дома култури и Катедралней церкви св. оца Микoлая и Вельки народни оркестер Дома култури, под руководством Лидиї Пашо, односно Мирка Преґуна, виведли шпиванку „Писня Рускому Керестуру” познатого поету Якима Сивча.
Публика мала нагоду одпатриц и виривок з документарно-бавеного филма „Йован Хранилович − чловек злучованя” и часц филма о Руским народним просвитним дружтве, а Мирослав Малацко през ґлуму на бини представел улогу оца Михайла Мудрия у националним препородзе рускей заєднїци.
Композицию Онуфрия Тимка „Думка” обробел Мирко Преґун, а виведол ю Вельки народни оркестер Дома култури. Керестурска Дзивоцка ґрупа ґрупа „Ария”, у чиїм составе були − Марина Роман, Дорика Чизмар, Наташа Колесар, Йована Ноґавица и Саня Чапко, а на ґитари их провадзел Сашо Палєнкаш, одшпивала композицию „Там под дубину”.
Кристина Афич наступела зоз власну, побиднїцку писню на прешлорочней „Червеней ружи” у катеґориї за найлєпши цалосни наступ, „Пойдзем”, а Катарина Кочиш виведла народну шпиванку „Понад гору, над високу”. За обидва писнї аранжман подписал Мирослав Пап, а провадзел их Национални оркестер.
Присутни мали нагоду послухац и Камерни состав Школи за основне музичне образованє, оддзелєня у Руским Керестуре, у чиїм составе дакедишнї школяре, а терашнї професоре, виведли руски народни мелодиї „Дунай широки”, у аранжману Мирка Преґуна.
Програма закончена зоз мелодиями Националного оркестру, котри источашнє преславел и свой мали дзешецрочни ювилей иснованя, и енерґично одграли „Танєц зоз опери Фрол Скобеєв” Тихона Хреникова и Шостаковичов „Валцер число 2” у обробку Мирона Сивча. Док грали „З давен давна” у на видео-биму емитовани кратки филм о тершнїм материялни богатстве Руснацох „Хвильково национални рамики”.
Велька сала Дома култури була преполна з публику, з тей нагоди до Руского Керестура пришли числени госци, орґанизовано на автобусох, Руснаци зоз шицких местох дзе жию у Сербиї. Понеже ше и обчековало же Велька сала нє будзе досц велька, у просторийох дакедишнього „Клубу 10” у Доме култури програму могло провадзиц и прейґ видео-биму.
През програму публику водзели Марина Сабадош и Владимир Бодянец, а авторка конферанси була Мая Зазуляк Гарди. Шветочносц пририхтали Орґанизацийни одбор Централней шветочносци у составе − Олґа Карлаварис, Лїляна Барна Никитович, Агнета Тимко Мудри, Анамария Ранкович, Мирослав Пап, Йоаким Рац, Таня Арва Планчак, Желько Ковач, Славко Орос и предсидателька Олена Планчак Сакач, Завод за културу войводянских Руснацох, Дом култури Руски Керестур и Национални совит рускей националней меншини.
Технїчну потримовку дала Радио-телевизия Войводини, а реализацию преслави финансийно помогли Покраїнски секретарият за културу, явне информованє и одношеня з вирскима заєднїцами, Општина Кула и Национални совит рускей националней меншини.
По законченю музично-културней програми, за шицких госцох и домашнїх бул пририхтани коктел у ресторану „Червена Ружа” котрому присустовали коло 400 особи.
Вецей фотоґрафиї мож поопатрац у нашей фотоґалериї.
