НОВИ САД – На вчерайшей схадзки Скупштини АП Войводини покраїнски посланїки за нового Покраїнского защитнїка гражданох-омбудсмана вибрали проф. др Зорана Павловича (1965), бувшого явного окружного тужителя у Новим Садзе и терашнього позарядового професора права на Правним факултету за привреду и правосудство у Новим Садзе.
Др Павлович на тоту функцию вибрани на предлог владаюцей коалциї (СНС-СПС-ЄС-СВМ), а за його вибор гласали 94 покраїнски посланїки, медзи нїма и з ДС, док 10 були процив – з ЛСВ и СРС. За вибор Покраїнского омбудсмана була потребна двотрецинска векшина, односно 81 глас.
У розправи пред вибором предсидатель Посланїцкей ґрупи СНС Миленко Йованов гварел же найважнєйше же би омбудсман бул вибрани по законє, як и же Павлович по фаховосци сполнює шицки условия за тоту функцию, та же нїґда нє бул член анї єдней политичней странки, анї нє конкуровал за було яку политичну функцию.
По виборе за Покраїнского омбудсмана Зоран Павлович новинаром гварел же ше у чаше од 30 днї по пребераню функциї обраци медийом.
Функцию Покраїнского омбудсмана од 2010. року дотераз окончовала Анико Мушкиня Гайнрих.
ртв/021/зам фото 021