После адаптованя и монтираня опреми у будинку Червеного крижа у Улїци цара Лазара число 10, у центре Шиду почала робиц сучасна народна кухня у хторей ше кажди роботни дзень порихта варене єдло 350 хасновательом.
Локална самоуправа у Шидзе опредзелєла шейсц милиони динари за адаптованє будинку, а прейґа Медзинародней федерациї Червеного крижа обезпечена опрема, помивачки(судопери), кухньово елементи и комори за чуванє поживи.
– У тей хвильки на списку маме 350 хасновательх, а вше єст фамелиї „на чеканю”, хтори сцу постац нашо хаснователє. Роботни днї рихтаме варени єдла, а през викенд сухи. Єдла пририхтую двойо заняти особи. Червени криж Сербиї нам обезпечує поживу за дзевец мешаци, а три мешаци ше стара локална самоуправа хтора финансує занятих – наглашує Душица Полетан, секретарка Червеного крижа.
Понеже єст присустни миґранти на шидским подручу, у Народней кухнї ше пририхтую и єдла за коло 500 хасновательох у Прилапним центре при Адашевцох. Полудзенки ше гражданом Шиду роботни днї видава од 11 по 13 годзин, а за тим цо нє можу присц, єдло ше ноши дому. Таки єст 15 фамелиї. Тиж запровадзене и добре сотруднїцтво зоз Центром за социялну роботу дзекуюци хторому ше утвердзує хтори особи у потреби же би могли буц хаснователє Народней кухнї.
– Ми з роботу урядово почали штредком юлия, а у септембру плануєме и шветочно отвериц кухню. Тераз нам вельо олєгчанша робота, бо кухня ту дзе и нашо просториї и нєт вельо шпацираня, як кед була у дворе Општинскей управи – додава Душица Полетан.